Shymkent qalasynyń ortalyǵynda ornalasqan belgili attraktsiondar parkiniń zańsyz salynǵany anyqtaldy, dep habarlaidy Dalanews.kz.
“Sot joǵaryda kórsetilgen jaǵdailardy, sondai-aq JShS-niń jer telimin zańsyz paidalanǵanyn eskere otyryp, talap aryzdy qanaǵattandyrdy jáne JShS-ge 4 gektar aýmaqty bosatyp, qurylys nysandaryn súrý arqyly jerdi bastapqy qalpyna keltirýdi mindettedi. Sheshim zańdy kúshine engen joq”, – delingen Joǵarǵy sottyń baspasóz qyzmeti taratqan habarlamada.
Belgili bolǵandai, 2011 jyly JShS Shymkenttiń ortalyǵyndaǵy 4 gektar jer telimin jalǵa alǵan. Alaida jalǵa alýshy balalar ortalyǵyn salý jónindegi mindettemelerin oryndaýdyń ornyna, atalǵan aýmaqta “Qiial álemi” attraktsiondar parkin ornalastyrǵan.
Sońǵy jyldary bul orynda qaiǵyly jaǵdailar jiilep ketti. Máselen, órt shyǵyp, eki stýdent pen bir er adam qaza bolǵan edi.
Ákimdik JShS-niń jaldaý kelisimshartyn buzǵanyn alǵa tartyp, sotqa onyń kúshin joiý týraly talap aryz bergen.
“Ekonomikalyq sot pen apelliatsiialyq instantsiia JShS-ni jer telimin kommýnaldyq menshikke qaitarýǵa mindettedi. Bul sheshim zańdy kúshine engen soń, ákim parkte zańsyz salynǵan qurylys nysandaryn JShS esebinen súrý jáne jerdi bastapqy qalpyna keltirý týraly sotqa taǵy bir talap aryz túsirdi”, – delingen habarlamada.
Sot barysynda JShS attraktsiondar, átkenshekter jáne ózge de qurylys nysandarynyń zańdy túrde paidalanýǵa berilgenin rastaityn qujattardy usyna almaǵany atap ótildi.
