Sybailas jemqorlyqqa qarsy is-qimyl agenttigi Preventsiia qyzmetiniń basshysy Saian Ahmetjanov BAQ ókilderine jaqynda Shymkentte bolǵan jaǵdaiǵa qatysty pikir bildirdi, dep habarlaidy Dalanews.kz.
6 aqpanda Shymkentte ákimniń qatysýymen ótken jinalysta turǵyn úi basqarmasynyń basshysy 120 million teńge shyǵyn keltirdi degen kúdikke ilinip, antikor qolyna túsken bolatyn. Bul jaǵdai áleýmettik jelide kópshiliktiń talqysyna tústi. Biri ákimniń bul áreketin jaqtap jatsa, biri dattap jatty. Tipti muny arnaiy qoiylymǵa teńegender de tabyldy.
Osy tusta munyń durys ne burys ekenin naqtylaý maqsatynda jýrnalister Ahmetjanovtyń osy jaǵdaiǵa bailanysty pikir bildiriýin surady. Ol óz kezeginde antikor barlyq jerde ashyq áreket etetinin alǵa tartty.
"Biz jaǵdaidy qarap shyqtyq. Buǵan bailanysty Sybailas jemqorlyqqa qarsy qyzmet búkil jerde ashyq áreket etetinin aittyq. Antikordy (oqiǵa ornyna) shaqyrǵanda jergilikti atqarýshy organmen aldyn ala kelisim bolady. Bul qala ákiminiń bastamasy bolýy múmkin", - dedi Cybailas jemqorlyqqa qarsy qyzmet polkovnigi.
Eske salaiyq, Shymkentte sheneýnikti Antikor qyzmetkerleri jinalys ústinde alyp ketken bolatyn. Bul týraly qala ákimi Ǵabit Syzdyqbekov óziniń Instagram paraqshasynda jariialaǵan. Videoda ol árbir memlekettik qyzmetshi óz qyzmetinde aldymen halyqtyń igiligin oilap, soǵan súiene sheshim qabyldaýy kerek ekenin atap ótedi.
"Ákimdik qyzmetkerleriniń arasynda adal jumys isteitinder kóp, biraq satqyndar da bar, men sizderge talai ret eskerttim", - degen ákim basqa amalynyń qalmaǵanyn aitqan bolatyn.
