Sanjar Begimbetov – 10-synyp oqýshysy. Ol Almaty qalasy Naýryzbai aýdanynda anasymen birge aiadai ǵana tar bólmeli páterdi jaldap turady. Osydan 5 jyl buryn kóz janarynan aiyrylǵan anasy jumyssyz. Anasynyń densaýlyǵyna bailanysty kúnkórisi nasharlaǵan, Sanjardyń erte jastan eńbekke aralasýyna týra keledi.
– 12 jasymnan jumys istei bastadym. Bastapqyda bazarǵa shyǵyp nan satyp júrdim. Bar tapqan aqshamdy anama ákelip beremin. Óitkeni, páteraqy, kommýnaldyq tólemder, kúndelikti azyq-túlik siiaqty shyǵyndardyń bárin tóleý úshin aqsha kerek boldy, – deidi Sanjar.
Sanjar anasynyń kózi qalpyna kelse dep armandaidy. Emdetýge qarajaty jetpeidi. Dáriler qymbat. Qazir ol úiiniń janyndaǵy kólik jýý beketinde jumys isteidi. Kúndelikti sabaǵynan keiin osynda kelip, 2-3 myń teńge tabady. Bar tapqanyn jinap, anasy ekeýi qajetti shyǵyndaryna jetkizýge tyrysady.
– Osydan 5 jyl buryn kózim kórmei qaldym. Joldasym bizdi tastap ketken... Jaldamaly páterge 15 myń teńge, gaz ben jaryq úshin 4 myń teńge tóleimiz. Buryn tiginshilikpen ainalysqanmyn. Qazir ózdigimnen júrip-tura almaimyn... Otbasymyzdyń bar aýyrtpalyǵy 10-synyp oqityn ulymnyń moinynda, – dep kózine jas alady jalǵyzbasty ana Qamash Bekimbetova.
Úshinshi maýsymy kórermenderge jol tartqan «Sheshimi bar» áleýmettik baǵdarlamasynyń búgingi keiipkeri Sanjar mektep bitirgen soń, oqýǵa túsýdi armandaidy. Sondai-aq, anasynyń kóz janaryn tolyq tekserýden ótkizip, múgedektikke shyǵarýǵa múmkindik aldy. Qujattaryn qalpyna keltirýge kúsh salyp júr. Eń bastysy, baǵdarlamada «Hareket» qairymdylyq qory muńlyq jandardyń armanyn oryndap, baspana kiltin tabys etti! Bul – «Sheshimi bar» baǵdarlamasynda muqtaj jandarǵa tabystalǵan tórtinshi baspana.
Búgin saǵat 18.10-da «Almaty» telearnasynyń efirinen kórsetiletin «Sheshimi bar» baǵdarlamasynyń «Bolmaǵan balalyq shaq...» atty kezekti shyǵarylymyn tamashalaýǵa shaqyramyz.
