Sherzat Polattyń ákesi Qarjaýbai Nurymov ulynyń ólimi úshin sot belgilegen 660 million teńge ótemaqyny óz qajetine jaratpai, balalar úiine aýdarmaq. Bul týraly otbasynyń advokaty Meiirman Shekeev málimdedi, dep habarlaidy Dalanews.kz.
“Qarjaýbai – kóp sóilemeitin, minezi tuiyq, biraq óte adal adam. Men onyń týrashyldyǵyna erekshe qurmetpen qaraimyn. Alǵash kezdeskenimizde maǵan: “Maǵan qylmyskerlerdiń jaza alyp, almaýy mańyzdy emes. Bastysy – olar Sherzattyń atyna kir keltirmesin. Ulymnyń aryn taptamaýyn ǵana qalaimyn”, – degen edi , – deidi advokat.
Alaida Shekeev ótemaqy talap etpese, sottalǵandar shartty jaza alyp ketýi múmkin ekenin túsindirgennen keiin, Qarjaýbai Nurymov 660 million teńge kólemindegi ótemaqyny talap etýge kelisken. Biraq ol bul aqshany jeke paidasyna emes, balalar úiine aýdarýdy uiǵarǵan.
Eske salaiyq, buǵan deiin Sherzat Polattyń ólimine qatysty sot protsesinde advokattar aiyptalýshylardan talap etiletin moraldyq ótemaqynyń somasyn oqyp bergen edi.
- Birinshi, Shynasyl Abzaldan Qarjaýbai Nurymovtyń paidasyna ulynyń jerleý rásimine qatysty jumsalǵan shyǵyn óteýi retinde 2 million 794 myń teńge mólsherinde somany óndirýdi;
- Ekinshi, Shynasyl Abzal jáne Ravil Sákievten ortaqtasqan, iaǵni úlestik túrde Qarjaýbai Nurymovtyń paidasyna qylmystyq quqyq buzýshylyqtyń moraldyq ziianynyń óteýi retinde 100 million teńge mólsherinde ótemaqy óndirýdi;
- Úshinshi, Shynasyl Abzal men Ravil Sákievten ortaqtasqan úlestik túrde Bishimbieva Gúlbaranyń paidasyna qylmystyq quqyq buzýshylyqtyń moraldyq ziianynyń óteýi retinde 100 million teńge ótemaqy óndirýdi;
- Tórtinshi, Shynasyl Abzal jáne Sákiev Ravilden ortaqtasqan úlestik normada Jumabike Qadyrovanyń qylmystyq quqyq buzýshylyq keltirgen moraldyq ziianynyń óteýi retinde 100 million teńge ótemaqy óndirýdi suraimyz, – dedi jábirlenýshilerdiń advokattary.
