Taldyqorǵanda Sherzat Bolattyń isi boiynsha aldyn ala sot tyńdaýy bastalýǵa jaqyn, dep habarlaidy Dalanews.kz.
Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵimaratyna jábirlenýshi tarap pen BAQ ókilderi jinala bastady.
“Qazir sýdia qatysýshylardyń pikirin eskerip, qaýly shyǵarady. Qaýlyǵa sáikes ashyq bola ma, joq pa sheshiledi. Búgin tek aldyn ala tyńdaý bolady. 15-20 minýt kútýlerińizdi suraimyz”, — dedi Joǵarǵy sot ókili.
Aita keteiik, buǵan deiin Joǵarǵy sot Sherzat Bolat isi boiynsha sot otyrysy nelikten Taldyqorǵanda ótetinin túsindirgen edi.
“Aiyp taǵylǵan toǵyz adam Taldyqorǵandaǵy tergeý izoliatorynda qamaýda otyr. Sol sebepti aldyn ala tyńdaý Jetisý oblysynda ótedi”, — dedi Joǵarǵy sot.
Quqyq qorǵaýshy Meiirman Shekeev sot otyrysy baspasóz ókilderine ashyq túrde ótetinin, biraq Qýandyq Bishimbaevtyń isi sekildi onlain transliatsiia júrgizilmeitinin málimdedi.
“Isti Almaty oblystyq soty qaraidy. Kelesi sot otyrystary Qaskeleńde jalǵasýy múmkin. Bul tek aldyn ala tyńdaý” – dep túsindirdi ol.
Sotta Marqum Sherzat Bolattyń otbasynyń múddesin Meiirman Shekeev jetekshilik etetin alty advokat qorǵaidy. Olar: Jandos Palmanov, Álim Mustafaev, Dina Dosaeva, Nurbolat Ibraev, Baqdat Amandosuly jáne Bekzat Miazov.
Eske salaiyq, buǵan deiin Sherzat Polattyń ákesi Qarjaýbai Nurymov balasynyń ólimine qatysy bar degen kúdiktilerge qatysty qosymsha aryz daiyndap jatqanyn habarlaǵan edik. Bul týraly jábirlenýshi taraptyń jańadan qosylǵan advokaty Meiirman Shekeev málimdedi.
“Is materialdarymen tanysa kele, biz bul qylmystyq is aiasynda azamattyq talaptyń berilmegenin anyqtadyq. Qazir sol talapty ázirlep jatyrmyz. Bul áreket Qarjaýbai myrzaǵa qarjylai ótemaqy alý úshin emes, qamaýda otyrǵan kúdiktilerge úkim shyqqan soń olardyń merziminen buryn bosap ketýine jol bermeý maqsatynda jasalyp otyr”, – dedi Shekeev.
Advokat qoǵamda qyzý talqylanǵan bir suraqqa da jaýap berdi.
“Halyqty alańdatyp otyrǵan mańyzdy suraqtardyń biri – oqiǵa ornynda bolǵan eki qyzdyń taǵdyry. Olar áleýmettik jelilerde kúdikti retinde kórsetilgenimen, is materialdaryna sáikes, tek kýáger retinde jaýap berdi”, – dedi qorǵaýshy.
Meiirman Shekeevtiń aitýynsha, bul qylmystyq is boiynsha 9 adam kúdikti retinde tanylǵan. Sonyń ishinde bireýi – kámelet jasyna tolmaǵan. Oǵan Qylmystyq kodekstiń 434-baby — qylmys týraly habarlamaý boiynsha aiyp taǵylǵan. Al jábirlenýshiler sany – alty. Olardyń ekeýi – Sherzat pen Nurqanat.
