40-shy ret uiymdastyrylyp otyrǵan álem birinshiligine 50 memlekettiń quryshbilekti sportshylary jinalyp, ózara baq synasty.
Jasóspirimder jáne jastar, eresekter jáne ardagerler arasynda ótkizilgen dúbirli básekede «Shardara Armsport» sport klýbynyń qol kúresshileri el namysyn abyroimen qorǵap, qorjynymyzǵa 9 altyn, 4 kúmis, 3 qola medal saldy.
"Túrkiia jerine tastúiin daiyndyqpen attanǵan jerlesterimiz biylǵy chempionatta óte joǵary deńgeide óner kórsetti. Bir chempionatta toǵyz birdei sportshynyń álem chempiony atanýy buryn-sońdy bolmaǵan jetistik" dep jazady bul rette Ońtústik Qazaqstan basylymy.
Bul jeńisterdiń barlyǵy da ailar boiy tógilgen ter men eren eńbektiń arqasy ekenin aitqymyz keledi. Alpaýyt elder arasynda ótken bairaqty básekede myqtylyqtaryn kezekti ret moiyndatyp kelgen shardaralyq sportshylarǵa qandai qurmet kórsetsek te jarasady.
Endi álem chempionatynda jeńiske jetken ul-qyzdarymyzdy tanystyrsaq.
Jasóspirimder arasynda ótken saiysta 50 keli salmaqta Júsip Darhan, 55 kelide Qadyr Nurhan, 60 kelide Sarybai Erdáýlet, 80 kelide Qarjaý Esbolat, qyzdar arasynda 65 keli salmaqta Kamal Ulbala álem chempiony atansa, jastar arasynda ótken saiysta 60 keli salmaqta Óserbai Qydyr, qyzdar arasynda Málikaidar Lázzat álem chempiony atandy.
Eresekter arasynda 55 keli salmaqta Ábsattar Dáýren, 65 keli salmaqta Aidarhan Nurdáýlet álem chempiony ataǵyn jeńip aldy. Aita keteiik, Aidarhan Nurdáýlet osymen tórtinshi márte álem chempiony atanyp, óz salmaǵynda dúnie júzinde teń keler qarsylas joǵyn dáleldep otyr.
Aqtyq synǵa deiin súrinbei jetip, kúmis medal taǵynǵan jasóspirimder arasynda 75 kelide Aitbek Beket, 80 keliden joǵary salmaqta Arapbai Azamat, jastar arasynda qyzdardan 65 kelidegi Málik Juldyz, ardagerler arasynda 100 keli salmaqta Taǵabaev Berik syndy sportshylarymyz bar.
Sol siiaqty jasóspirimder arasynda ótken saiysta 65 keli salmaqta Pirimbet Abzal, eresekter arasynda ótken saiysta 70 kelide Aqtaev Talǵat, 110 kelide Quttymuratov Medet esimdi shardaralyq qol kúresshiler qola medal ielenip, úshinshi oryndy baǵyndyrdy.
Ádil Ábdiramanov
