Pavlodardaǵy qylmystyq-atqarý júiesi mekemeleriniń birinde prokýrorlar sottalǵandarǵa saqtaýǵa jáne paidalanýǵa tyiym salynǵan zattardy anyqtady. Olardyń qatarynda 15 smartfon, alty Wi-Fi roýteri jáne Sony PlayStation oiyn pristavkasy bar, dep habarlaidy dalanews.kz.
Prokýratýra málimetinshe, óńirdegi qylmystyq-atqarý júiesi mekemelerinde rejim talaptarynyń saqtalýyn tekserý jáne tyiym salynǵan zattardyń ishke ótkizilý joldaryn anyqtaý maqsatynda tekserý júrgizilgen.
«Mekemelerdiń birindegi bólmeden 15 smartfon, alty Wi-Fi roýteri, symsyz jáne symdy qulaqqaptar, USB kabelderi, flesh-kartalar, Sony PlayStation oiyn pristavkasy jáne sottalǵandarǵa saqtaýǵa ári paidalanýǵa tyiym salynǵan basqa da zattar tabylyp, tárkilendi», – delingen habarlamada.
Anyqtalǵan zańbuzýshylyqtarǵa bailanysty Pavlodar oblysynyń prokýratýrasy Qazaqstan Respýblikasy Qylmystyq kodeksiniń 371-baby (salǵyrttyq) boiynsha sotqa deiingi tergep-tekserýdi tirkedi.
Qazir tyiym salynǵan zattardyń rejimdik nysanǵa qalai jetkizilgeni, olardy ishke ótkizý tásilderi jáne bul iske qatysy bolýy múmkin adamdar anyqtalyp jatyr. Sotqa deiingi tergep-tekserý múddesine bailanysty Qylmystyq-protsestik kodekstiń 201-babyna sáikes ózge aqparat jariialanbaidy.
