Astanada ondaǵan er azamat Respýblika dańǵylynyń boiynda ornalasqan neke agenttiginiń ǵimaratyna shabýyl jasady dep jazady sn.kz. Narazy top sheteldikterge turmysqa shyqqan qyzdarymyzdy azamattyǵynan aiyrý kerek dep esepteidi.
Neke agenttigi ǵimaratynyń aldyna 30-dan astam adam jinalǵan. Olardyń qatarynda qazaq qyzdaryn qyitailyqtarǵa kúieýge berýge qarsylyq bildirgen belsendiler, quqyq qorǵaý organdarynyń ókilderi, tilshiler jáne atalǵan agenttiktiń direktory bar.
Agenttik direktory eshkimge qyz bergeli jatqan joq ekenin aityp aqtalýda. Ol jinalǵan jurtqa máseleniń mán-jaiyn túsindirgendei boldy.
"Biz qyz satýmen ainalyspaimyz. Biz otbasyn qurýǵa kómektesemiz, bizge qyzdar men áielder kúieý taýyp ber dep jalynyp keledi. Jastary kelgen, olarǵa bala tabý kerek. Endi osyndai qazaqtyń jigitteri qaida? Kelińizder, tirkelińizder bizge, otbasyn quryńyzdar! Áielder amal joq, kúieýdi shetelden izdep jatyr. Biz jurtqa toqal nemese jezókshe taýyp beretin kompaniia emespiz. Bizge tirkelgisi keletin er azamattar ajyrasqandyǵy týraly kýáligin kórsetýge mindetti, sonda ǵana tirkeimiz", - deidi agenttiktiń direktory Tatiana Logvinenko.
Al, belsendiler bolsa qazaq qyzdaryn qandai jaǵdai bolmasyn qytailyqtarǵa berýge bolmaitynyn eskertti.
"Biz qazaq qyzdaryn satýǵa qarsymyz. Aldymen 20 er azamaty keler, onyń artynan biraq taǵy 20 myńy keledi. Siz bizdiń dástúrimizdi de, tilimizdi de bilmeisiz. 40 jyldan beri Qazaqstanda turyp kelesiz, biraq qazaqtardyń dástúrinen múldem beihabarsyz", - dep aiyptady belsendi Sáýle Seidalina agenttiktiń direktoryn.
"Meili, kúieýge shyǵa bersin, baqytty bolsyn! Biraq, olardy azamattyǵynan aiyrýymyz qajet, óz kúieýleri qai elden sol eldiń azamattyǵyn qabyldaýy kerek", - deidi Aidyn Aiymbetov.
Jiyn sońy aiqai-shýǵa ulasty. Qos tarap birin-biri kinálap álek. Belsendiler agenttik direktoryn qazaq salty men tilin bilmeidi dep aiyptasa, T.Logvinenko jinalǵandardy natsist dep qaralady.
