Sultan Sársemalievtiń burynǵy jubaiy Aqbaian Muqanǵalieva Almatyda statsionarlyq keshendi psihologiialyq-psihiatriialyq saraptamadan ótti. Atyraý oblysynyń prokýratýrasy saraptama nátijesin habarlap, áielge qatysty tergeýdiń qazirgi mártebesine túsinikteme berdi, dep dalanews.kz tilshisi "Aq Jaiyq" basylymyna silteme jasap habarlaidy.
Aqbaian Muqanǵalievanyń esimi Jangeldin aýylynda tórt adamnyń ólimine qatysty sot protsesi barysynda birneshe ret atalǵan edi. Ol buryn osy is boiynsha aiyptalyp jatqan Sultan Sársemalievpen nekede bolǵan jáne onyń balalarynyń anasy.
Redaktsiia saýalyna bergen jaýabynda prokýratýra Almatyda júrgizilgen statsionarlyq keshendi sot-psihologiialyq jáne psihiatriialyq saraptama qorytyndysy boiynsha mamandar oǵan ári qarai baqylaý qajet degen usynys bergenin habarlady.
"Almaty qalasynda júrgizilgen statsionarlyq keshendi sot-psihologiialyq-psihiatriialyq saraptama qorytyndysyna sáikes, Aqbaian Muqanǵalieva dinamikalyq baqylaý men differentsialdy diagnostikaǵa muqtaj", – dep málimdedi qadaǵalaý organy.
Prokýratýra onyń protsessýaldyq mártebesine de toqtaldy. Vedomstvo málimetinshe, 2026 jylǵy 27 sáýirde Muqanǵalievaǵa qatysty QR Qylmystyq kodeksiniń 99-baby 2-bóligi 1-tarmaǵy boiynsha qozǵalǵan qylmystyq is qylmystyq quqyq buzýshylyq quramynyń bolmaýyna bailanysty toqtatylǵan.
Alaida oǵan qatysty tergeý tolyq aiaqtalǵan joq. Negizgi qylmystyq istiń materialdarynan QR QK-niń 434-baby – "Qylmys týraly habarlamaý" belgileri boiynsha jeke is bólingen.
Prokýratýranyń habarlaýynsha, Muqanǵalievanyń áreketine túpkilikti quqyqtyq baǵa ázirge berilgen joq. Oǵan qatysty qandai da bir bultartpaý sharasy tańdalmaǵan.
"Qylmystyq qýdalaý organy isti durys sheshý úshin qajetti jáne jetkilikti mán-jailardy jan-jaqty, tolyq ári obektivti zertteý maqsatynda barlyq qajetti sharalardy qabyldap jatyr. Júrgizilgen tergeý áreketteriniń nátijesi boiynsha túpkilikti protsessýaldyq sheshim qabyldanady", – dep habarlady vedomstvo.
Prokýratýra sondai-aq QR Qylmystyq-protsestik kodeksiniń 201-babyna sáikes, tergeý múddesine bailanysty sotqa deiingi tergep-tekserýdiń ózge málimetteri jariia etilmeitinin eske saldy.
