Qazaqstan mektepterine úshtildilikti engizý máselesine arnalǵan IQ Studio saraptamalyq jiyny bolyp ótti. Oǵan akademik Asqar Jumadildaev, jýrnalist Ámirjan Qosanov, qoǵam qairatkeri Dos Kóshim shaqyrylyp, engizilgeli otyrǵan reformaǵa qatysty pikirler men oilar ortaǵa salyndy.
Atalǵan ult ziialylary bul reformanyń tolyqtai qarastyrylmaǵan jáne pisip jetilmegenin biraýyzdan aitty. Bul tusta olar úsh tuǵyrly tilge emes, úsh tildi bastaýysh synyptan bastap oqytý máselesine narazy ekendikterin atap aitty.
"Bul sońǵy ýaqyttarda qazaq tildilerdiń kóbeiip kele jatqanyna orys tilin san-túrli aila-tásildermen saqtap qalý úshin jasalǵan tehnologiia dep oilaimyn",- dedi Dos Kóshim.
Dos Kóshim jiyn moderatory Rasýl Jumalynyń:
"Buǵan deiin aitylyp kelgen másele - ekitildilik saiasat. Sol ekitildilik saiasaty óziniń qorytyndysyna keldi me, ekinshiden osy ekitildilik saiasatty bitirmei jatyp, úshtildilik tuǵyrǵa kóshý qanshalyqty qisyndy?", - degen suraǵyna:
"Bul shopan da, bazarda otyrǵan qazaqtar da talqylap jatqan másele. Sondyqtan biz muny júie dep ataiyq. Bul jerde úsh naqty másele bar. Birinshisi, balanyń basyn atala qylyp, tórt-bes jastan qazaqsha, oryssha, aǵylshynsha úiretý. Ekinshiden joǵarǵy synyptarda negizgi pánder, negizgi fizika, himiia, matematikanyń aǵylshyn tilinde ótýi. Bul bizdiń qabyldai almai jatqan ekinshi máselemiz. Úshinshi másele bar, bul - jalpy tarihty orys tilinde berý", - deidi ol.
"Jiyrma jeti jyl boiy orystildi balalarǵa qazaq tilin oqytyp, "sálemetsiz be" degen sózdi bilmeitin balalardy tárbielep shyǵarǵan ministrlik, qalaisha úsh tilde oqytady. Bul ministrlikke qalai senýge bolady. Nelikten mektepte tarih páninen sabaqty orys tilinde berýimiz kerek, osyǵan ýáj bar ma? negizdeme bar ma? Dúniejúzi mektepteri oryssha oqytyp jatyr dese túsiner em", - dedi ol.
Dos Kóshimniń aitýynsha, mundai sheshim shyǵarýǵa bilim ministrliginiń esh negizdemesi bolmaǵan.
DEREKKÓZ: nur.kz
