Saǵyntaev Qyrǵyzstan delegatsiiasymen kelissózderden soń málimdeme jasady
– Qazir ǵana Premer-Ministr Sapar Isakov bastaǵan Qyrǵyzstannyń resmi delegatsiiasynyń ókilderimen kelissózder aiaqtaldy. Bul quramynda 30 adamy bar aitarlyqtai úlken delegatsiia bolatyn. Óz kezeginde delegatsiia ókilderiniń aýqymdylyǵy keń kólemdegi ekonomikalyq máseleler boiynsha, jan-jaqty áńgime júrgizýge múmkindik berdi. Bul kezdesý jýyrda ǵana qyrǵyz tarapynyń bastamasymen telefon arqyly bolǵan áńgimeden soń uiymdastyryldy, – delingen Úkimettiń resmi saity taratqan málimdeme mátininde.
– Birinshiden biz ekijaqty ekonomikalyq qatynastardyń problemalyq máselelerin talqyladyq. Olar bizdiń elderimizdiń shekara, kólik, fitosanitarlyq jáne veterinarlyq baqylaý máseleleri boiynsha ózara yqpaldastyq máselelerin qamtidy. Sonymen qatar, EAEO pen DSU-nyń sáikes normalary men erejeleri negizindegi kedendik jáne salyqtyq ákimshilendirýge qatysty problemalyq máseleler talqylandy. Mysaly bizdiń keden organdarymyz qyrǵyzstandyq import tasymaldaýshylardyń Qytaidan Qazaqstan shekarasy arqyly taýar tasymaldaǵan kezderinde deklaratsiialaý sharalaryn talapqa sai ótkizbeý áreketterin anyqtaidy. Onyń saldarynan Qazaqstan ekonomikasy zardap shegedi. Qyrǵyz tarapy aldyǵa qoiylǵan máselelermen kelisti. Premer-Ministr Sapar Ysqaqaov Qyrǵyzstan tarapynan óz mindettemeleri men Eýraziialyq ekonomikalyq odaqtyń ekonomikalyq múddelerin oryndaý baǵytyndaǵy problemalardy sheshýde tiimdi sharalardyń qoldanylatynyna kepildik berdi, – dedi Qazaqstan Úkimet basshysy.
Premer-Ministrdiń aitýynsha, kelissózder nátijesinde Qazaqstan men Qyrǵyzstan Úkimetteriniń birinshi orynbasarlarynyń tóraǵalyǵymen jumys tobyn qurý týraly sheshim qabyldanǵan. Jumys tobyna 5 kún ishinde birlesken Jol kartasyn ázirleý kerek bolady.
Jol kartasy ázirlengen soń taraptar kelisilgen máselelerdiń júzege asyrylýyn tolyqtai qamtamasyz etýleri kerek. «Biz sonymen qatar 2017 jyldyń 19 qazany kúni saǵat 00-00-den bastap, eki eldiń shekaralarynan ótýde basym baǵyttardyń tártibi qamtamasyz etiletindigi jóninde kelistik. Bul talaptar negizinen: Qordaida júgi bar jeke tulǵalar, turaqty jolaýshylar tasymaldaityn avtokólik quraldary, jeńil kólik, júk kólikteri úshin qoldanylady», – dedi Baqytjan Saǵyntaev.
https://www.youtube.com/watch?v=ma2gIbCMGNk
Derekkózi: inform.kz
