Qyzylordada kólik qaǵyp, bes ailyq sábiinen aiyrylǵan Nargiz esimdi áielge ekinshi operatsiia jasalatyny belgili boldy. Al onyń týysy Janerke Seralieva áleýmettik jelide jazba jariialap, jol apatyna kúdikti júrgizýshiniń uzaq ýaqyt boiy ustalmaǵanyna narazylyq bildirdi, dep habarlaidy dalanews.kz.
Janerke Seralievanyń aitýynsha, aýyr jaraqat alǵan Nargizge araǵa eki kún salyp taǵy bir operatsiia jasaý josparlanǵan. Jaqynynyń densaýlyǵyna alańdaǵan ol quqyq qorǵaý organdarynyń jumysyna qatysty birqatar suraq qoidy.
«Araǵa eki kún salyp Nargizge ekinshi operatsiia jasaiyn dep jatyr! Oǵan moraldyq turǵydan óte qiyn, túsingen adamǵa!» – dep jazdy ol Instagram paraqshasynda.
Sondai-aq áiel jol apatyna qatysy bar júrgizýshiniń týystary beinejazbany áleýmettik jeliden alyp tastaýdy surap, birneshe ret habarlasqanyn málimdedi.
«Videony alyp tastasyn dep týystardy jaǵalap baryp, úzdiksiz olarǵa, maǵan telefon soqqandai, qylmyskerdiń týǵan-týysyn, áke-sheshesin, áielin de dál solai qyspaqqa almadyńyzdar ma?!» – dep jazdy Janerke Seralieva.
Ol politsiia qyzmetkerlerinen kúdiktini izdeý jumystarynyń nátijesin ashyq aitýdy talap etken.
«Politsiia bizdi qorǵai ma? Politsiiadan qorǵanýymyz kerek pe? Osynsha ýaqyt ishinde taba almaýǵa ne kedergi?! Qashan qolǵa túsiresizder?! Nátije qashan kóremiz?!» – dep janaiqaiyn jetkizdi áiel.
Bes ailyq sábi jol apatynan kóz jumǵan
Eske sala keteiik, qaiǵyly oqiǵa 13 qazanda Qyzylorda qalasyndaǵy Qultekenov kóshesinde bolǵan.
Aldyn ala málimet boiynsha, saǵat 17:10 shamasynda Mitsubishi Lancer avtokóliginiń júrgizýshisi bes ailyq sábii bar áieldi qaǵyp ketken. Jol-kólik oqiǵasynan keiin júrgizýshi zardap shekkenderge kómek kórsetpesten, oqiǵa ornynan ketip qalǵan.
Ana men bala aýyr jaraqatpen aýrýhanaǵa jetkizilgen. Alaida dárigerler sábidiń ómirin saqtap qala almady.
Al Nargiz birneshe kún boiy es-tússiz jatqan. Onyń bas súiegi, qabyrǵalary, buǵanasy, jambasy men tobyǵy synǵany, sondai-aq ókpesi zaqymdanǵany habarlandy.
Keiin áieldiń esin jiǵany belgili boldy. Degenmen alǵan aýyr jaraqattaryna bailanysty oǵan meditsinalyq kómek kórsetý jalǵasqan.
Kúdiktige izdeý jariialanǵan
Qyzylorda oblystyq politsiia departamenti jol apatyna bailanysty qylmystyq is qozǵaǵan.
Quqyq qorǵaý organdary kólik júrgizýshisiniń jeke basyn anyqtap, oǵan resmi izdeý jariialady. Sondai-aq sot kúdiktini syrttai qamaýǵa alý týraly sheshim qabyldaǵan.
31 qazanda jariialanǵan aqparatqa sáikes, júrgizýshi áli qolǵa túspegen bolatyn.
Al zardap shekken otbasynyń jaqyndary oqiǵanyń ádil tergelip, kináli adamnyń zań aldynda jaýap berýin talap etip otyr.
Qazirgi ýaqytta kúdiktiniń ustalǵany týraly keiingi resmi aqparat anyqtalǵan joq.