QMA Qyzylorda oblysy boiynsha departamenti prokýratýranyń úilestirýimen jáne UQK departamentimen birlesip, Shieli aýdanynda baǵaly metaldardy zańsyz óndirýmen ainalysqan qylmystyq toptyń áreketin toqtatty, dep habarlaidy dalanews.kz.
Tergeý dereginshe, Jamankól shatqalynda kúrdeli óndiristik óńdeýdi qajet etpeitin tabiǵi altyn óndirilgen. Top músheleriniń mindetteri ózara naqty bólingen: bireýleri altyn izdeýshilerdi tartyp, óndirý jumysyn uiymdastyrsa, endi bireýleri tasymaldaý men satýǵa jaýapty bolǵan. Taǵy bir bóligi qaýipsizdikti qamtamasyz etken.
Zańsyz áreketti jasyrý úshin aýmaqtyń ainalasyna baqylaýshylar qoiylyp, mototsikl mingen adamdar mańaidy torýyldaǵan. Olar bógde adamdardyń nemese memlekettik organdar qyzmetkerleriniń kelgenin aldyn ala eskertip otyrǵan.
Óndirilgen altyn satý úshin Almaty qalasyna jetkizilip, odan túsken aqsha top músheleriniń arasynda bólingen. Tintý barysynda quramynda altyny bar 500 gramnan astam shikizat, 2 arnaiy tehnika, 12 metall izdegish jáne 6 avtokólik tárkilendi.
Sondai-aq 2 pnevmatikalyq tapansha men tegis uńǵyly myltyq tabyldy. Qazir 13 adam qamaýǵa alyndy. Tergeý jalǵasyp jatyr.
