Jańadan kásip ashqysy kelgen adam úshin qajetti biznes-ideiany tańdaý, biznes-jospar ázirleý, salyqtardy túsiný, satýdy jolǵa qoiý – munyń bári ońai sharýa emes. Kásippen ainalysý úlken táýekeldilikti talap etedi. Kez kelgen kásipti igerý ekiniń biriniń qolynan kele bermeidi. Sondai-aq, qai isti bolmasyn bastaý úshin de adamnyń ynta-yqylasy jetkiliksiz, onyń alǵan bilimine qosa qarym-qabileti men tájiribesiniń bolýy mańyzdy. Shyny kerek, bireý istegendi ekinshi bireý istei alady deý de jańsaq pikir. Óitkeni ár adamnyń óresi ár túrli. Alaida, memleket kásip bastaimyn degenderge mol múmkindik berip otyr. Tek qalaýly isti taýyp, sony urshyqsha iirý qajet. Máselen kásipkerlerdi qoldaýǵa baǵyttalǵan memlekettik baǵdarlamaǵa qatysyp, joba arqyly óziniń kásibin ashqan kásipkerlerdiń biri - tekelilik Leonid Pak. Kazirgi tańda qolóner sheberi óz isin ashyp, kásibin damytyp jatyr.
Kásibin ashpas buryn qalalyq Atameken kásipkerler palatasynda «Biznes keńesshi» baǵdarlamasy arqyly bilim alyp, tigin salasy boiynsha dáris alǵan. 2020 jyly jeltoqsan aiynda óz jobasyn qorǵap, memleket tarapynan 2 mln teńge kóleminde grant ielengen.
Búginde tsehqa qajetti qural-jabdyqtardy satyp alyp, tabiǵi teri ónimderinen kúndelikti ómirde qoldanysqa jaraityn zattardy satylymǵa shyǵaryp otyr. Sheberdiń qolynan shyǵatyn buiymdardyń bir ereksheligi -tabiǵi jáne Moskva, Túrkiia syndy elderden ákelinetin sapaly teri ónimderin qoldanýy. Satylymǵa shyǵaratyn zattary da qol jetimdi. Ár tutynýshy óz talǵamyna sai dizain túrin tańdap tapsyrys bere alady.
Aita ketsek qazirgi tańda Leonid Pak tekelilik 2 turǵyndy turaqty jumyspen qamtyp otyr. Sonymen qatar osy óner túrine qyzyǵýshylyq tanytqan jastardy da oqytyp, óz isterin bastaýǵa jol kórsetýde. Qazirgi tańda tsehta 30- ǵa tarta túrli tústi buiymdar shyǵarylyp, internet resýrstary arqyly jaqyn mańdaǵy qalalarǵa jóneltiledi.
«Qatardaǵy mamannan qolóner sheberine ainalý men úshin kóp izdenisti talap etti. Bul salaǵa kelmes buryn Almaty qalasynda teri ónimderin óńdeý boiynsha oqytylatyn ár túrli qýrstarǵa qatysyp, alǵan bilimimdi tájiribe júzinde shyńdadym. Barshalaryńyzdy óz isterińizdi ashyp, jeke kásip bastaýǵa shaqyramyn. Sebebi qazir orta jáne shaǵyn bizneske memleket tarapynan kórsetiletin qoldaý kóp. Meniń qazirgi ainalysyp otyrǵan kásibimdi áli de damytyp, atadan balaǵa mura etip qaldyrý basty maqsatym» deidi qolóner sheberi.
Endi kásipker ǵimarat aýmaǵyn da keńeitip, ónimderin elimizdiń basqa da qalalaryna tasymaldaýdy josparlar otyr. Sondai-aq qalamyzda da osy kásipti damytyp, teri óndirisin qolǵa alý oiynda bar.
Osyndai azdan bastap, kóp is tyndyrǵan jandardyń ómiri bizge qashanda úlgi. Qai iste bolmasyn adaldyq degen kirshiksiz dúniege kir túsirmeý azamattyq paryz ekeni beseneden belgili. Al mundai kásip ieleri kásibin jańa ashqandarǵa isimen tálim bereri sózsiz.
Uljan ULDAHANQYZY,
Tekeli qalasy ákiminiń baspasóz hatshysy
