Ulytaý oblystyq soty burynǵy prokýror Samat Qanievke qatysty úkim shyǵardy, dep habarlaidy Dalanews.kz.
Tergeý deregine sáikes, ol bir azamattan “qylmystyq isti sheshýge kómektesemin” dep ýáde berip, eki million teńge alǵan. Kaniev mamyr aiynda Qyzylordada ustalǵan.
2025 jyldyń sáýirinde eńbek demalysynda júrip, tanysyna ózin áli de qyzmette júrgen prokýrormyn dep tanystyryp, “qylmystyq isti rettep beremin” degen jeleýmen aqsha alǵan. Aqshany birneshe bólikpen alǵanymen, ýáde etken is-áreketterin oryndamaǵan. Sot barysynda Qaniev kinásin tolyq moiyndap, mundai qadamǵa anasynyń aýyr naýqasy men qaryzdarynyń saldarynan barǵanyn alǵa tartqan.
Eks-prokýror “alaiaqtyq” jáne “para berýge itermeleý” baptary boiynsha kináli dep tanylyp, úsh jarym jylǵa bas bostandyǵynan aiyryldy. Sonymen qatar, ol memlekettik qyzmette jumys isteý quqyǵynan ómir boiyna aiyrylyp, “birinshi synypty zańger” ataǵynan da aiyryldy.
Bul ýaqytta Atyraýda "Samuryq-Qazynanyń" enshiles kompaniiasy basshylyǵynyń qatysy bar kóp milliondyq para men urlyq faktileri boiynsha iri sybailas jemqorlyq isi qaralyp jatyr.
