Almatydaǵy Qazaq ulttyq ýniversiteti aýmaǵyndaǵy Timýr Qulybaevtyń ieligine ótip ketken jer memleketke qaitaryldy. Bul týraly Májilis depýtaty, zańger Baqytjan Bazarbek aitty, - dep habarlaidy Dalanews.kz.
Depýtattyń aitýynsha, QazUÝ-dyń jeri tolyǵymen memlekettik menshikke ótti, tiisti sottyń sheshimi shyqqan.
"Jer amanaty" respýblikalyq jer komissiiasy aiasynda Almaty qalasy jer resýrstaryn basqarý departamentiniń talap aryzy boiynsha QazUÝ-dyń zańsyz ketken jeri boiynsha Almaty qalasy ákimdiginiń 2007 jylǵy 2 qazandaǵy qaýlysy men birqatar satyp alý-satý sharttary 2024 jylǵy 9 sáýirdegi Almaty qalasy mamandandyrylǵan ekonomikalyq soty sheshimine sáikes zańsyz dep tanylǵan bolatyn. 2024 jylǵy 27 mamyrda Almaty qalasynyń apelliatsiialyq sot alqasy birinshi satydaǵy sot sheshimin kúshinde qaldyryp, QazUÝ-dyń kólemi 0,7168 gektar jeriniń (kadastrlik nómiri: 20-313-009-029) qaýlysy men satyp alý-satý sharttaryn zańsyz dep tanydy.
Endi jer ústindegi 10 qabatty biznes ortalyǵyn Timýr Qulybaev kompaniialary QazUÝ-ǵa berýi tiis, muny men Parlament Májilisiniń jalpy jinalysynda Bas prokýrorǵa úndeý jasaǵanda eskerttim. Bul sottyń sheshimi ádildiktiń shyńy,"Jańa Qazaqstannyń" bastaýy bolǵai", - dedi ol.
Sonymen qatar, depýtat jer Imanǵali Tasmaǵambetovtiń kezinde zańsyz ielikke ótkenin de aitty.
"QazUÝ-dyń jerine bailanysty úzildi-kesildi núkte qoiyldy. Almaty qalasyndaǵy ál-Farabi dańǵylynda QazUÝ-dyń ótip ketken úlken jeri bar. Sol jeri kezinde Imanǵali Tasmaǵambetovtyń zańsyz qol qoiǵan qaýlysy, ásirese, 2007 jylǵy qaýlysyna sáikes QazUÝ-dyń ieliginen memlekettik qajettilik úshin alynǵan bolatyn. Ol jer keiin SKY ENGINEERING JShS-ǵa satyp alý-satý shartymen berilip ketken", - dedi Bazarbek.
Keiin jer birneshe JShS-ǵa qaita satylǵan. Aqyr aiaǵynda 2017 jyly ATLAS DEVELOPMENT JShS-ǵa satylǵan. Baqytjan Bazarbek bul JShS-nyń iesi Timýr jáne Dinara Qulybaevtar ekenin aitty.
"...Ádildik oryn aldy. Qulybaevtyń ieligindegi úlken QazUÝ-dyń jeri biznes ortalyqpen birge memlekettik menshikke ótti deýge bolady", - dedi depýtat.
