Qazaqstan–Qytai shekarasynda júzdegen aýyr júk kóligi saǵattap sozylǵan uzyn-sonar kezekte tur. Bul tek Qytai Halyq Respýblikasy tarapynan júrgiziletin baiaý rásimderge emes, sonymen qatar, tasymaldaýshylardyń áreketine de bailanysty bolyp otyr, – dep habarlaidy Dalanews.kz.
Qarjy ministrligine qarasty Memlekettik kirister komitetiniń túsindirýinshe, shekaradaǵy keptelistiń negizgi sebebi - júrgizýshilerdiń elektron kezek júiesi belgilegen ýaqyttan buryn kelýi. Júrgizýshiler ózderine bólingen ýaqytty eskermei, shekara beketterine erte jetedi. Sonyń saldarynan kólikter úiilip qalady, tipti 2023 jyldyń 1 shildesinen iske qosylǵan jańa tsifrlyq júieniń ózi munshama júktemeni kótere almai jatyr.
Jaǵdaidy Qytai tarapynan júk ótkizýdiń báseńdeýi de ýshyqtyryp tur. Jergilikti bilik jol men infraqurylymdy, ásirese, tekserý keshenderin jóndep jatqandyqtan, ótkizý jyldamdyǵy tómendep ketken. Onyń ústine Qytaida dál qazir maýsymdyq qarbalas kezeń: merekelik ýaqyttarda tasymaldaý kólemi ádettegiden de ósedi.
Qazaqstannyń Memlekettik kirister komiteti Qytai tarapymen belsendi dialog júrip jatqanyn, rásimderdi jedeldetý men ótkizý qabiletin arttyrý joldary qarastyrylyp jatqanyn málimdedi.
Sheneýnikter kelissóz júrgizip jatqanda, shekaradaǵy jaǵdai áli de kúrdeli bolyp tur. Tasymaldaýshylarǵa tártipti ustanyp, logistikany ózderi kúrdelendirmeýden basqa amal qalmai tur.
Qytaimen shekaradaǵy mundai jaǵdai buryn da bolǵan.
Qańtarda Qazaqstan men Qytai arasynda úshinshi temirjol ótkizý pýnktin ashý josparlanǵany habarlanǵan edi.
