Elimizde sý tasqynyn dál boljaý úshin jańa tehnologiialar engizilip jatyr. Sý resýrstary jáne irrigatsiia ministri Nurjan Nurjigitov Úkimet otyrysynda 2025 jyly sý tasqyny boljamdarynyń dáldigin arttyrý úshin engizilgen tsifrlyq sheshimder týraly aitty, dep habarlaidy Dalanews.kz.
Ministrdiń aitýynsha, Qazaqstanda alǵash ret sý tasqynyna beiim ýchaskelerdegi yqtimal jaǵdailardy modeldeýdiń innovatsiialyq quraly «Tasqyn» júiesi paidalanylyp jatyr.
Júie kún saiyn «Qazsýshar» RMK basqarýyndaǵy 86 sý qoimasynyń jumys rejimi týraly derektermen jańartylady. Sondai-aq, sý deńgeileri men aǵyny boiynsha naqty jáne boljamdy derekterdi qamtityn 75 ózenniń tsifrlyq gidrografy ázirlendi. Júiede «Qazgidromet» RMK jáne GloFAS (GloFas) halyqaralyq platformasynyń derekteri paidalanylady.
Budan bólek, ministrlik BUU Damý Baǵdarlamasymen (PROON) birlesip, sý qoimalaryndaǵy sýdyń kelý kólemin boljaýǵa arnalǵan Talsim aqparattyq júiesin engizip jatyr. Qazir Esil jáne Nura ózenderiniń basseinderi modeldengen. Elimiz boiynsha barlyq sý resýrsyn modeldeýdi aiaqtaý jyl sońyna deiin josparlanyp otyr. Jańa júielerdiń tiimdiligi is júzinde dáleldengen.
"Mysal retinde Talsim júiesi 11 sáýirge qarai Astana sý qoimasyna 91 tekshe metr/sek kóleminde sý kelýin boljady, naqty túsim 97,2 tekshe metr/sek boldy. Al óz kezeginde «Tasqyn» júiesi Atbasar qalasy mańyndaǵy Jabai ózeninde 7 sáýirge arnalǵan sý tasqynynyń sharyqtaý shegin 581 tekshe metr/sek dep boljady, naqty aǵys 567 tekshe metr/sek boldy", - dep túiindedi ministr.
