Búgin QR Prezidenti janyndaǵy Ortalyq kommýnikatsiialar qyzmetinde ótken baspasóz konferentsiiasynda Mádeniet jáne aqparat ministrliginiń resmi ókili Elvira Júrgenbaeva men "Qazaq Culture" saityn ázirleýshi Merei Zeinesh "Qazaq Culture" biregei jobasyn tanystyrdy, - dep habarlaidy Dalanews.kz.
Spikerler Mádeniet jáne aqparat ministrliginiń aqparattyq-tanymdyq platformasyn qurýdaǵy basty maqsaty – eldiń mádeni murasyn nasihattaý, ulttyq brendti tanytý ekenin atap ótti. Bul sait Qazaqstan mádenieti men tarihy týraly tyń málimet taratatyn aqparat kózi bolatynyn sóz etti.
Saittyń qurylýy - Qazaqstannyń mádeni murasy men alýan túrliligine álemdik qoǵamdastyqtyń nazaryn aýdarýdaǵy mańyzdy qadam. Qazaqstanda, sondai-aq jaqyn jáne alys shetelderde mádeni qundylyqtardy nasihattaý Memleket basshysynyń vedomstvo aldyna qoiǵan basym baǵyttarynyń biri bolyp qala beredi.
Elimizdegi mádeni muranyń san túrliligin kórsetetin aýqymdy joba BUU-nyń alty resmi tilinde jáne qazaq, túrik tilderinde aqparat taratady.
Aqparattyq portalda Qazaqstannyń biregei muraǵat qorynyń derekteri erekshe oryn alady. Qazaqstannyń qujattary men muraǵat materialdarynyń bai tarihi jinaǵyna qol jetkizýdi qamtamasyz etetin bólim – zertteýshilerge, tarihshylar jáne eldiń ótkenine qyzyǵatyndar úshin baǵa jetpes resýrs.
Saittyń negizgi bólimi – eldegi, álemdegi barlyq mádeni jańalyqtardan habardar etetin jańalyqtar blogy. Bul bólimde qyzyqty festivaldar, jármeńkeler, konkýrstar, sondai-aq teatr qoiylymdary men otandyq kinokartinalardyń premeralary, tanymal jáne jas jazýshylar kitaptarynyń tusaýkeserleri, kórkem kórmeler, mereitoilyq merekeler, túrli kólemdegi óńirlik jobalar jariialanatyn bolady.
Sondai-aq, platformada elimizdiń óneri men mádenietindegi sońǵy jańalyqtar qamtylatyn otandyq mobildi qosymshalar týraly aqparat beriledi.
"Qazaqstan mádenieti jasandy intellekt prizmasy arqyly" bólimi virtýaldy shyndyq arqyly barlyq óńirler men olardyń kórikti jerlerin zertteýge múmkindik beredi.
Portalda aqparattyq tehnologiialarǵa erekshe mán berilgen.
"Qazaq Culture" kórermenderge virtýaldy 3D-týrlar arqasynda Qazaqstannyń túrli óńirlerine sapar shegip, olardyń kórikti jerlerin zertteýge taptyrmas múmkindik beredi. Al jasandy intellekttiń kómegimen saitqa kirgen ár qonaq fotosýretin engizip, ózin batyr nemese Uly dala jaýyngeri beinesinde kóre alady.
Saitty daiyndaý barysynda sheteldik ozyq tájirbieler paidalanyldy. Atap aitqanda, tirkelip, jazylý arqyly týrister belgili bir qalanyń nemese jalpy eldiń kez kelgen mýzeilerine (Túrkiia tájiribesi) bara alatyn biryńǵai biletti onlain rásimdeý qarastyrylǵan.
Saittyń basty ereksheligi – deldaldar qyzmeti úshin artyq qarjy jumasamai, barlyq mádeni nysandarǵa kiretin biryńǵai bilet júiesi. Bul qyzmetti qosý arqyly "Astana Hab" Aiti akseleratorynyń startapyn qoldaý kózdelgen. Portal qoldanýshylaryna yńǵaily bolý úshin belgili bir mádeni is-sharanyń biletin satyp alýǵa silteme beriledi.
"Qazaq Culture" - Qazaqstannyń mol mádeni murasy men tereń tarihyna qyzyǵýshylyq tanytatyndar úshin ámbebap qural.
