Senat depýtaty Altynbek Nuhuly Qazaqstanda kómirdi tek jaǵý emes, tereń óńdeý arqyly ekonomikalyq tiimdilikti arttyrý qajet ekenin aitty, dep habarlaidy Dalanews.kz.
Onyń sózinshe, elimiz jer qoinaýy bai memleketterdiń biri jáne kómir qory jóninen álemde toǵyzynshy orynda tur. Ǵylymi boljam boiynsha, Qazaqstanda shamamen 260 milliard tonna kómir bar, bul úsh ǵasyrǵa jetedi.
“Sonyń ishinde zerttelgeni 32 mlrd tonna. Bul qordyń basym bóligi Pavlodar men Qaraǵandy aimaǵynda ornalasqan. Elimizde 2024 jyly 108 mln tonnadan astam kómir óndirildi. Kóptegen damyǵan elder kómirden jáne kómir qaldyqtarynan himiialyq qaita óńdeý arqyly 80-nen astam baǵaly zattar men ónimder alýǵa bet burǵan”, - deidi depýtat.
Altynbek Nuhuly Qytai tájiribesine erekshe nazar aýdardy. Onyń aitýynsha, Qytai jyl saiyn 2,7 milliard tonna kómir óndirse, sonyń 200 million tonnasy himiialyq jolmen qaita óńdeledi.
“Sonyń nátijesinde tabiǵi gazdan bastap, organikalyq tyńaitqysh, eritkishter, kosmetikalyq ónimder, kómirtekti nanotalshyqtar, jartylai ótkizgishter, batareialar men sirek metalldar siiaqty túrli zattar alynady”, — deidi ol.
