Qazaqstanda alǵash ret avtokólik ónerkásibine arnalǵan kýzovtyq bólshekterdi shyǵaratyn shtamptaý óndirisi iske qosyldy. Joba Saran qalasyndaǵy QazTehna zaýytynda júzege asyrylyp jatyr. QazTehna - avtobýs pen kommertsiialyq tehnika shyǵaratyn otandyq jetekshi kásiporyn. Joba tolyq óndiristik tsikldi, tolyq tsikldi damytýǵa jáne eldiń indýstriialyq bazasyn nyǵaitýǵa baǵyttalǵan, dep habarlaidy Dalanews.kz.
Jobanyń jalpy investitsiialyq kólemi ekinshi kezeńdi qosa eseptegende 20 milliard teńgeden asady. Óndiristik alańdy daiyndaý jumystary kompaniianyń óz qarajaty esebinen júrgizilse, al jabdyqtardy satyp alý Ónerkásipti damytý qorynyń qoldaýymen júzege asyrylyp jatyr.
Jańa óndiristik korpýs 10 000 astam sharshy metr aýmaqty quraidy jáne elimizde balamasy joq gidravlikalyq shtamptaý pressimen jabdyqtalady. Bul zamanaýi jabdyq avtobýstardyń metall bólshekteriniń keń spektrin shyǵarýǵa múmkindik beredi. Jobanyń iske asyrylýy otandyq quramdas bólikterdiń úlesin edáýir arttyryp, óńirde jańa jumys oryndarynyń qurylýyna jol ashady.
Jobanyń erekshelikteriniń biri metallýrgiialyq kombinat Qarmet óndiretin 08KP markaly qazaqstandyq myryshtalǵan bolatty qoldaný. Atalǵan ónim halyqaralyq sertifikattaýdan sátti ótip, sapa jaǵynan álemdik standarttarǵa sai keletinin dáleldedi. Bul importty almastyrý jáne tehnologiialyq táýelsizdikke baǵyttalǵan mańyzdy qadamdardyń biri.
Bastapqy kezeńde shtamptaý jelisi Yutong markaly qalalyq, týristik jáne mektep avtobýstaryna arnalǵan kýzovtyq bólshekterdi shyǵarady. Keiinnen óndiris aiasyn keńeitip, HOWO markaly kommertsiialyq tehnikaǵa arnalǵan bólshekter de óndiriletin bolady.
Qazirgi tańda óndiris alańynda jabdyqtardy ornatý jáne qurylys jumystary qatar júrgizilýde. Óndiristi iske qosý 2025 jyldyń tamyzyna josparlanǵan.
Bul bastama Memleket basshysynyń 2024 jylǵy Joldaýynda aitylǵan ónerkásiptik áleýetti arttyrý jónindegi strategiialyq mindetterine tolyq sai keledi. Sonymen qatar ol mashina jasaý salasynda tehnologiialyq klasterdi qalyptastyrýǵa, jergilikti jetkizýshiler men aralas óndiristerdi damytýǵa jańa múmkindikter ashady.
