QR Ónerkásip jáne qurylys ministrliginiń Geologiia komitetinde Jer qoinaýyn geologiialyq-geofizikalyq zertteýdiń 2019-2024 jyldarǵa arnalǵan memlekettik baǵdarlamasyn iske asyrý qorytyndylary shyǵaryldy, dep habarlaidy Dalanews.kz
Alty jyl ishinde 2,014 mln sh. m. aýmaqty qamtityn geologiialyq barlaý jumystary júrgizildi. Bul josparlanǵan aýmaqtyń 91,6% quraidy.
Baǵdarlamanyń maqsaty – 2026 jylǵa qarai el aýmaǵyn geologiialyq turǵydan tolyq qamtý, jer qoinaýynyń investitsiialyq tartymdylyǵyn arttyrý jáne mineraldyq-shikizat keshenin turaqty damytýdyń ǵylymi bazasyn qalyptastyrý.
112 ýchaskede tórt negizgi baǵyt boiynsha jumystar aiaqtaldy: geologiialyq barlaý, mineralogiialyq karta jasaý, tereń kartalaý jáne gidrogeologiia. Boljamdy resýrstary bar 38 perspektivaly baǵyt anyqtaldy:
- sirek jer metaldary – 2,6 mln tonna;
- mys pen nikel – 3,7 mln tonna;
- qońyr kómir – 1,1 mlrd tonna;
- altyn – 19 tonna.
Odan bólek, munai-gaz ónerkásibi Aral shógindi basseininde 266 mln tonna kóleminde alynatyn kómirsýtek resýrstaryn rastady.
Baǵdarlamany júzege asyrý kezeńinde geologiialyq barlaýǵa 306 litsenziia berildi. Salaǵa tartylǵan jeke investitsiia kólemi 137 mlrd teńgeden asty.
Kadrlardyń ósýin jáne geolog mamandyǵynyń tanymaldylyǵyn atap ótken jón. 2022-2024 jyldar aralyǵynda geologiia mamandyǵyn bitirýshiler sany 2,5 esege ósti. Sala mamandaryna arnalǵan tuńǵysh memlekettik marapat – «Eńbek sińirgen geolog» taǵaiyndaldy.
Qazaqstan geologiialyq barlaý jumystarynyń sapasy men jer qoinaýyn paidalanýdyń ashyqtyǵy boiynsha Ortalyq Aziiada kóshbasshy bolýǵa bet aldy. Qalǵan 200 myń sharshy metrdi qamtityn baǵdarlama 2025-2026 jyldary jalǵasady. Nazar ońtústik jáne batys aimaqtarǵa, onyń ishinde Syrdariia basseinine jáne sirek metaldar boiynsha perspektivaly aimaqtarǵa aýdarylady.
