Qazaqstan men Ózbekstan arasyndaǵy shekarada uzyndyǵy birneshe shaqyrymǵa sozylǵan keptelis paida boldy, dep habarlaidy Dalanews.kz Gazeta.uz basylymyna silteme jasap.
Júrgizýshilerdiń aitýynsha, olar shekarada táýlikten astam ýaqyttan beri kezekte turýǵa májbúr.
Kezekte turǵan azamattardyń keibiri Qazaqstan jaǵynda shekaradan tez ótý úshin para suraityndar paida bolǵanyn aitady.
"Qazaqstan jaqta bes, on, tipti on bes myń rýblge shekaradan jyldam ótkizýge ýáde etetin adamdar paida bolǵan. Bul sumdyq qoi! Biraq basqa amal joq. Bireýler shydamai aqsha berip te jatyr", – deidi Ózbekstan turǵyny Igor Aipkin.
Keptelistiń arasynda Tájikstan nómirli avtokólikter de óte kóp. Olardyń basym bóligi Ózbekstan arqyly tranzitpen ótýge tyrysyp jatyr, biraq kólik aǵyny múldem toqtap qalǵan. Birneshe kúnnen keiin Qurban ait meiramy bastalady, adamdar úilerine tezirek jetýdi kózdeidi, biraq shekaradaǵy qozǵalys turalaǵan.
Ózbekstan azamaty Galina Nikitina birneshe saǵattyq kezekti kótere almai, shekarany jaiaý kesip ótkenin aitady. Onyń kúieýi kóligimen basqa pýnkt – "Iallamaǵa" ("B. Qonysbaev") barǵanymen, ondaǵy jaǵdai da ońala qoimaǵan.
"Ol jaqta da shamamen 150 kólik kezekte tur. Kóbi "Qaplanbekten" shyǵyp, bul jerden tez ótemiz be dep kelgender. Segiz saǵatta Ózbekstan aýmaǵyna bar-joǵy toǵyz kólik ótti. Bul jerde de aqsha úshin ótkizip beretin adamdar paida bolypty", – deidi ol.
Ózbekstannyń Keden komitetiniń baspasóz hatshysy Hýsen Tangriev Gazeta.uz basylymyna bergen málimetinde shekarada qoldan kedergi jasalmaǵanyn, beketterdiń qalypty rejimde jumys istep jatqanyn málimdedi.
"Qazirgi kezde Qazaqstan men Ózbekstan tarapy shekaranyń ótkizý qabiletin arttyrý jáne qosymsha baǵyttar ashý máselelerin talqylap jatyr", – dedi Tangriev.
