Ońtústik Qazaqstan oblysyndaǵy «Qazagrogrın» kásiporny fermerlerdi mal azyǵymen qamtamasyz etýdiń ınovasıalyq tásilin usyndy. Bul jerde arpa 1 apta ishinde ósiriledi. Gıdropondy mal azyǵynyń quramynda janýarlarǵa arnalǵan dárýmender men paıdaly zattar bar.
2015 jyly óńirde jumys jasap keletin kásiporyn 0,5 jáne 1, 2 tonnalyq gıdroponıkalyq qondyrǵyny óndirip kelse, bıyl jylyna 1460 tonna shamasynda jem-shóp shyǵarýǵa qaýqarly 4 tonnalyq jańa qondyrǵyny iske qosty. Osy ýaqyt ishinde kásiporyn óz qondyrǵylaryn oblystaǵy tórt iri sharýa qojalyqqa ornatqan. Al búginde tórt tonnalyq jańa qondyrǵyny «Atameken» sharýa qojalyǵyna ornatýda.
Sharýa qojalyqtar quny 29 jáne 72 mln teńge bolatyn qondyrǵyǵa «Ońtústik» AIO-nyń qarjylandyrýy arqyly qol jetkizip otyr. Endi ınovasıalyq tyń ádisti ornatamyn degen fermerge memleket 10 mln teńge kóleminde sýbsıdıa bermek.
Jańa tehnologıanyń arqasynda jer jyrtyp, mal azyǵy az dep alańdamaısyz. Eńbek kúshin de talap etpeıdi. Gıdroponıka ádisi arqyly kúnine 2 tonna ónim óndirýge bolady. Al, jylyna shamamen 1500 tonna jem-shóp jınaýǵa múmkindik bar.
Kásiporyn dırektory Baqytjan Kópbaevtyń aıtýynsha, gıdroponıka ádisi arqyly daıyndalǵan ónimder arpa daqylynyń qunarlyǵymen para-par eken. Jasyl jemdi paıdalanǵan sharýa veterınarlyq aýrýlardy da birjolata umytady,-deıdi ol. Osylaısha, sharýalar tórt túligine qarjy únemdep, taza, ári qunarly jemmen azyqtandyra alady.
OQO ákiminiń baspasóz qyzmeti
