Qasym-Jomart Toqaev tek memleketten bólinetin qarajatqa qarap otyratyn sport federatsiialarynyń basshylaryn synǵa aldy dep habarlaidy Dalanews.kz.Aqorda baspasóz qyzmetine silteme jasap.
Prezident tártip, janashyrlyq, járdem berý sekildi ómirlik mańyzy bar qaǵidalardy qoǵamda ornyqtyrý isinde qutqarýshylar óskeleń urpaqqa úlgi bolýy kerek dep sanaidy.
– Oqý oryndaryna Tótenshe jaǵdailar ministrligi bólimsheleriniń beiresmi qamqorlyq kórsetý tájiribesin belsendi túrde engizgen durys. Qutqarýshylar qoǵamda salaýatty ómir saltyn nasihattaýǵa, balalar men jastar arasynda sportty dáripteýge zor úles qosa alady. Bul – shyn máninde strategiialyq mańyzy bar másele. Sebebi rýhy myqty, salaýatty urpaq tárbieleý – qazirgi jahandyq ózgerister zamanynda ult sapasyna tikelei áser etetin jaǵdai. Osy baǵytta Tótenshe jaǵdailar ministrligi sport federatsiialarymen ózara bailanys ornatyp, belsendi jumys istegeni jón. Jalpy, búgingi tańda sport federatsiialary abyroi-bedel jinaityn qurylymǵa ainalyp ketti. Kóptegen federatsiiany iri biznes ókilderi jáne memlekettik mekeme basshylary basqaryp otyr. Biraq ashyǵyn aitýymyz kerek, kásipkerler osy qoǵamdyq mańyzy bar iske óz qarjysyn salýǵa qulyqsyz, tek memleketten bólinetin qarajatqa qarap otyrady. Memlekettik qyzmetshiler de osy joǵary qoǵamdyq laýazymdardy ózin «jarnamalaý» quraly retinde kóredi, iaǵni sporttyń mánisine tereń boilamaidy. Tipti, sportshylardyń jetistigin ózderiniń jeke jeńisi dep sanaityndar bar. Mundai teris, jaǵymsyz úderiske tosqaýyl qoiý kerek. Osy másele boiynsha jan-jaqty taldaý júrgizý qajet. Bul jumysty Prezident Ákimshiligine tapsyramyn, – dedi Prezident.
Memleket basshysynyń paiymdaýynsha, sport jáne dene shynyqtyrýǵa qoldaý kórsetýdi qurmetti qoǵamdyq missiia jáne úlken azamattyq jaýapkershilik retinde qarastyrǵan jón.
– El ishinde jáne shetelde ataq-abyroiyńdy asqaqtatý úshin federatsiia basqarý durys emes. Oǵan jol berýge bolmaidy. Sondyqtan memleket kásipkerlerdi, sonyń ishinde iri biznesmenderdi qoldaidy. Biraq memleket pen qoǵam da olardyń osyǵan sai áreket etkenin kútedi. Atap aitqanda, bul sportty, mysaly fýtboldy kommertsiialandyrý máselesine qatysty. Týrizm jáne sport ministrligi men sport federatsiialarynyń arasynda teń quqyly dialog órbip, mindetteri men quzyretteri naqty aiqyndalǵan yntymaqtastyq jolǵa qoiylýǵa tiis. Kásipkerlerdiń bastamalaryn yntalandyrý – memlekettik saiasatymyzdyń negizgi basymdyǵy. Men buǵan erekshe mán beremin. Ótken aptada ekonomikalyq ahýalǵa qatysty arnaiy jiyn ótkizdim. Onda elimizdegi biznesti damytý máseleleri qarastyryldy. Keshe Premer-ministrge bergen tapsyrmamda shaǵyn jáne orta kásipkerlikti qoldaý qajettigine taǵy da basa nazar aýdardym. Qazir birqatar sport federatsiiasyna biznesmenderdiń, metsenattardyń jańa býyny kele bastady. Olarǵa sportty damytý salasyndaǵy jaǵdaidy jaqsartý mindeti júkteldi. Qazirdiń ózinde jumysqa jaýapkershilikpen qarap, mańyzdy jeńiske qol jetkizýge bar yntasymen umtylatyndaryn baiqap otyrmyz, – dedi Qasym-Jomart Toqaev.
