Qasym-Jomart Toqaev Qazaqstan halqyna shuǵyl úndeý jasady
Elimizdegi ahýal óte kúrdeli.
Meniń osyǵan deiin jasaǵan birneshe Úndeýime qaramastan ózderin «ereýilshiler» dep ataityn adamdar toby qasaqana túrde jaǵdaidy ýshyqtyryp otyr. Elimizdiń teń jartysyna jýyǵynda qaqtyǵystar oryn alýda. Ásirese, Almatydaǵy ahýal óte kúrdeli.
Bizdiń súiikti qalamyzda quqyq qorǵaý qyzmetkerlerine jappai shabýyl jasalyp jatyr. Olardyń arasynda qaza tapqandar men jaralanǵandar bar. Buzaqy toptar áskeri qyzmetshilerdi uryp-soǵyp, kóshege jalańash shyǵaryp, mazaqqa ainaldyrýda. Áielderdi zorlap, dúkenderdi tonap jatyr.
Bul jaǵdai Almatynyń barlyq turǵynyna qaýip tóndirip otyr. Buǵan tózýge bolmaidy. Almatydan basqa keibir oblys ortalyqtarynda da jaǵdai ýshyǵyp tur. Osyǵan bailanysty birqatar óńirde Tótenshe jaǵdai engizdim. Bul – qajetti shara.
Prezident retinde, men, azamattarymyzdyń qaýipsizdigi men tynyshtyǵyn qorǵaýǵa, Qazaqstannyń tutastyǵyna alańdaýǵa mindettimin. Meniń qabyldaǵan sharalarym kóp ultty Qazaqstannyń igiligine baǵyttalǵan. Alaida bul sharalar jetkiliksiz bolyp tur.
Buzaqy toptardyń áreketteri joǵary deńgeide uiymdastyrylǵanyn kórip otyrmyz. Bul qarjylandyrylǵan búlikshilerdiń jan-jaqty oilastyrylǵan jospary ekenin dáleldeidi. Bul – qaskóilerdiń qiturqy áreketi.
Sondyqtan Memleket basshysy jáne búginnen bastap Qaýipsizdik Keńesiniń Tóraǵasy retinde barynsha qatań áreket etemin. Bul – ómirin qorǵap qalýǵa ótinish bildirgen kóptegen azamatymyzdyń qaýipsizdigine qatysty másele.
Bul – memleketimizdiń qaýipsizdigine tikelei qatysty. Halyq meni qoldaitynyna senimdimin. Qandai jaǵdai bolsa da men elordada bolamyn. Halyqpen birge bolý – meniń Konstitýtsiialyq mindetim.
Biz jumyla otyryp, Qazaqstan tarihyndaǵy osy syn saǵatty birge eńseremiz. Budan shyńdalyp shyǵamyz. Jýyrda Qazaqstandy saiasi transformatsiialaý jónindegi jańa usynystarymdy jariialaimyn. Men dáiekti reformalardy burynǵydai jalǵastyra beremin.
Quqyq qorǵaý organdary men áskeri qyzmetshilerge erekshe alǵys bildiremin. Olar qarýly toptardyń soqqysyna keýdesin tosty. Ókinishke qarai qaza tapqandar da bar. Mert bolǵan azamattardyń otbasylarynyń qaiǵysyna ortaqtasyp, kóńil aitamyn.
Qurmetti dostar!
Barshańyzǵa shyn júrekten amanshylyq tileimin.
Halqymyz qubylmaly kezeńge tap boldy.
Dana halqymyz qiynshylyqtardyń bárin mindetti túrde eńseredi. Men buǵan kámil senemin.
Birge bolaiyq!
2022 jylǵy 05 qańtar
