Dalanews sói dep gápirgen saiasattanýshy Andrei Grozinniń sózin oqyrman nazaryna usynady.
Onyń aitýynsha AQSh Memhatshysynyń orynbasary Ýzra Zeidiń Qazaqstanǵa kelisi tegin emes. Aq úi ókili Aqordany Reseiden aýlaq júrýge kóndirip, Kremlden alystai túsýge keńes bergen.
"Reseige salynǵan soiqan sanktsiialardan úreii ushatyn odaqtasymyz AQSh-tyń aitqanynan shyǵa alar emes. Qazaqtar sanktsiiaǵa ushyraǵysy joq, sondyqtan saq qimyldaidy. Orys kompaniialaryn elge shaqyrýǵa batpai otyr, búiter bolsa Reseidiń sybailasy degen sanatqa kiredi. Munyń saldary qandai bolaryn qazaqtar kórip-bilip otyr", – deidi Grozin myrza.
...
Onyń pikirinshe qazaq elitasy Batystaǵy kapitaly buǵattalyp, dúnie-múlki tárkilengen reseilik bai-baǵlandardyń kúiin keshkisi kelmeidi. Qazaqstan Reseidi ashyqtan-ashyq qoldar bolsa, álgindei áreketke barý qiyndyq týǵyzbaidy.
Sói degen Grozin: "Qazaqstan eshkimmen qaq-soǵy ustanymnan taimaýǵa tyrysýda. Sonyń ózinde Batystyń yǵyna jyǵylyp, Reseiden alshaqtap barady" dep sanaidy.
"Aqordany táýbesine túsiretin kez kelgen shyǵar. Qazaqstan eksportynyń 90 paiyzy Resei aýmaǵymen ótedi. Osy arnanyń aýzyn býsa, bálkim, qazaq biliginiń esi kirer. Mundai álsiz odaqtastyń "erkeligin" qashanǵy keshire beremiz?!", – deidi ol.
...
Sarapshy Batys basylymdaryna suhbat berip, demokratiialyq qundylyqtardy tórge ozdyrǵan Toqaevtyń pozitsiiasyn túsinbei otyrǵanyn aitady. Ol dos pa, dushpan ba, áli de anyq emes dep paiymdaidy.
Grozinniń aitýynsha Qańtar dúrbeleńinde Toqaevty qutqaryp qalǵan jalǵyz adam - Pýtin.
"Toqaev Máskeýdiń senimimen shyǵa qoiǵan joq. Batys órkenieti ony áli kúnge deiin reseishil saiasatkerdiń qatarya qosady. Oǵan el ishinde úlken qysym jasalýda...", – degen Grozin "qysym jasap jatqan" aýditoriianyń atyn ataýdan qaimyǵypty.
Qazaqtildi aýditoriianyń basym bóligi Pýtinniń shapqynshylyǵyn qoldamaidy. Qańtar tóńkerisi arqyly eldegi ózgeriske qozǵaý salǵan qazaqtildi orta el biliginiń Reseidiń sózin sóilegenin quptamaidy. Ol ras.
...
Al Grozinniń aitýynsha Qazaqstandaǵy aiyrtildi aýditoriiaǵa Batystyń úkimettik uiymdary grant taratyp, baiqaý uiymdastyryp, peiilin buzǵan. Batystyń astaýynan jem jegen ásire ultshyldar áp-sátte qaýlap ósip shyǵyp, halyqty Reseige qarsy qoiypty.
"Toqaev batysshyl toptyń aitqanynan asa almai otyr. Reseidiń sózin sóileiin dese, AQSh pen Batystyń arbaýyna túsken qaýymnyń tabasyna qalady. Máskeý muny kórmei, bilmei otyrǵan joq. Sońǵy kezderi tym kósemsi bastaǵan kórshisine keńshilik tanyta ma, joq pa ol jaǵy Kreml basshylarynyń kóńil-kúiine bailanysty", – depti túiindepti Grozin.
Dýman BYQAI
