Resei Qyrǵyzstanda bolyp jatqan oqiǵalarǵa aianyshpen qarap alańdaidy, biraq protseske aralaspaidy. 22 qazanda "Valdai" klýbynyń kezekti otyrysy kezinde Resei prezidenti Vladimir Pýtin osylai dep málimdedi.
"Ol jaqty qyrsyq shaldy, sailaý da, tóńkeris te - qyrǵyz halqyna jabysqan bále" dedi Pýtin. Onyń sózinen TASS agenttigi úzindi keltiredi.
Pýtinniń pikirinshe, syrttan jasalǵan kez kelgen abaisyz qimyl "jas" memleketterdiń "jańadan qalyptasyp kele jatqan názik egemendik institýty men memlekettigine" nuqsan keltiredi.
"Adamdardyń ózderine qoǵam ishinen osy qatynasty qalyptastyrýǵa múmkindik berý kerek" deidi.
"Árine, ol jaqta bolyp jatqan oqiǵalarǵa aianysh bildirmei, alańdamai qaraý múmkin emes. Biraq biz aralaspaimyz. Biz jekelegen saiasi kúshterdi qoldamaimyz, aqyl-keńesimizdi tyqpalap, aralaspaimyz. Qyrǵyzstanda jaǵdai qalypqa keledi, memleket aiaǵynan tik turyp, dúrildep damidy, ara qatynasymyz jaqsy kúide qalady dep úmittenemiz" dedi ol.
Qyrǵyzstanda 4 qazanda ótken parlament sailaýynan keiin saiasi daǵdarys ornaǵan. Parlament sailaýynyń nátijesin joiýdy talap etken narazylyqtyń sońy tártipsizdikke ulasty. 6 qazanǵa qaraǵan túni demonstranttar parlament pen prezident apparat ornalasqan "Aq úidi" basyp aldy. Budan keiin Bishkekte túrli saiasi toptar arasynda bilikke talas kúsheidi. Aqyry ortalyq sailaý komissiiasy parlament sailaýynyń nátijesin joidy, prezident Sooronbai Jeenbekov otstavkaǵa ketti, al demonstranttar talabymen túrmeden shyqqan Sadyr Japarov úkimet jetekshisi bolyp sailandy. Oǵan prezident mindetin atqarý da júkteldi.
Qyrǵyzstan biligi elde jaǵdai tolyq turaqtanǵanyn aitady.
