Ne der eken? Qalai bolar eken? Ormandai orys ortaǵa salyp sózimizdi sóile dep qyspaqqa alar ma eken?.. Yǵyna jyǵylsa, basqa álemniń betine qalai qaraimyz?
Joq, memleket basshysy yqpady. Jaltaqtamady. Saspady. Shirenip otyryp halyqtyń qalaýy men ulttyq múdde syrtqy saiasi oiyndardan joǵary ekenin jetkizdi.
Eki eldiń arasyna iritki salyp, qazaqtyń delebesin qozdyratyn álgi arandatýshylar ári oinasyn dedi. Diplomatiialyq tilmen.
Árine, ókpesi jarylyp ketse de qajet kezde qaq mańdaidan bir qoiatyn Amerika ne Qytai emespiz, biraq oraǵytyp otyryp qudaishylyǵyn aitty.
Dári ólsheitin tarazyǵa tartylǵan baiandama da óte ózekti. Pragmatizmge tunyp tur. Suraqtarǵa aiyzyńdy qandyrardai jaýap berdi. Ekiushtylyq joq. Naqty.
Ásirese, syrtqy saiasatta spektrýmnyń bir buryshyn tańdamasa bolmaityn, buǵyp qalsa, ótip ketetin ádettegi túlkibulańǵa sala almaityn Ýkrainaǵa qatysty suraqta da bylaiǵy órkenietti álemniń ustanymynan tanbady. Oǵan da minez kerek, júrek kerek. Ony estigen ýkrain jurtshylyǵy óz segmentinde “qazaqtar jaraisyńdar” dep shýlasyp jatyr. Dál osy sózdi ózimiz aitqandai marqaiyp otyrmyz.
Peterborda ótken jiynda prezidentimizdiń túrli kommýnikatsiia kanaldary arqyly jetip jatqan úzik-úzik tsitatalaryn ańdyp otyryp oqyǵanymnan túigenim.
[video width="1920" height="1080" mp4="https://dalanews.kz/wp-content/uploads/2022/06/tokaev-pretenzii-1.mp4"][/video]
Buryn prezidentke qatysty mundai pafosty esh jazǵan emespin, biraq búgin bir razy boldym.
P.S. Prezidentimizdiń DNR men LNR-ge qatysty jaýabynan keiin jalpaq eldi jyldar boiy urysqa ázirlep kelgen moderatordyń ózi “qazir ursysatyn ýaqyt emes” dep toqailasypty. Mine, kerek bolsa!
Shyńǵys MUQAN, áleýmetttik jelidegi paraqshasynan
...
Aita ketsek, Qasym-Jomart Toqaev Peterbýrg halyqaralyq ekonomikalyq forýmynyń 25 jyldyǵyna arnalǵan jiynǵa qatysty.
Memleket basshysynyń aitýynsha, forým saiasi jáne ekonomikalyq ahýal shielenisip turǵan kezde ótip jatyr.
– Pandemiiaǵa jáne geosaiasi shielenistiń órshýine bailanysty jahandyq teke-tirester jańa jaǵdailarǵa alyp keldi. Jahandanýdyń ornyna artyq-kemi bar aimaqtandyrý dáýiri keldi.
Qalai bolǵanda da, dástúrli ekonomikalyq modelder men saýda baǵyttarynyń ózgerý úderisi jedeldei tústi. Álem jyldam ózgerýde. Ókinishke qarai, kóp jaǵdaida jaqsy jaǵyna qarai emes, – dedi Prezident.
[video width="1184" height="668" mp4="https://dalanews.kz/wp-content/uploads/2022/06/288539809_1214081902675530_8030787223810270478_n.mp4"][/video]
Shara barysynda Memleket basshysy Kreml jýrnalisteriniń birqatar saýalyna jaýap berdi. Sonyń ishinde LNR men DNR sekildi kvaziqurylymdarǵa qatysty pikir bildirip, Qazaqstan bulardyń táýelsizdigin moiyndamaitynyn málim etti.
QR Prezidentiniń atap ótýinshe, eger ulttarǵa tańdaý quqyǵy berilse, onda jer sharynda 193 memlekettiń ornyna 500-600 memleket qurylar edi.
Toqaev budan bólek sońǵy kezderi Qazaqstannyń ishki sharýasyna tumsyq tyǵyp, eldiń qaýipsizdigine qater tóndiretin málimdeme jasaǵan reseilik tanymal tulǵalarǵa qatysty pikir bildirdi.
"Mundai málimdemeler orys pen qazaqtyń arasyna syna qaǵyp, Reseidiń repýtatsiiasyna kesirin tigizýde. Men mundai úndeýlerdiń maqsatyn túsinbeimin. Qazaqstan men Reseidiń arasynda eshqandai arazdyq joq", – dedi Memleket basshysy.
Kezdesý moderatory, Kreml propagandisi Margarita Simonian bul ýájdi oryndy dep taýyp, "qazir urys-keris izdeitin ýaqyt emes" dep aqtaldy.
[video width="1280" height="720" mp4="https://dalanews.kz/wp-content/uploads/2022/06/288842319_704528843945211_3066023754933349278_n.mp4"][/video]
Buǵan deiin Dalanews.kz Qazaqstanǵa soqtyqqan Kreml qolshoqpary Tigran Keosaiannyń kýratoryn tapqanyn habarlaǵan edi.
https://dalanews.kz/saraptama/78652-amanat-partiiasy-140-myng-gektardan-astam-zhay
https://dalanews.kz/sadak/76742-keosaiannyng-kuratory-kim
