Zań jobasy Qazaqstan Rerspýblikasynyń Tuńǵysh Prezidenti – Elbasy N.Nazarbaevtyń Qazaqstan halqyna Joldaýyn júzege asyrý aiasynda ázirlengen bolatyn. Ol pedagogtardyń quqyqtaryn keńeitýge, olardy ózine tán emes qyzmetten bosatýǵa, júktemeni azaitýǵa, muǵalim mamandyǵyna qoiylatyn talaptardy kúsheitýge baǵyttalǵan ári jumys isteitin muǵalimderdiń materialdyq turǵyda yntalandyrý tetikterin, sondai-aq jastardy pedagog mamandyǵyna tartý máselelerin qarastyrady.
Bul zań jobasy 21 baptan turady, onyń erejeleri mektepke deiingi, orta, tehnikalyq jáne kásiptik, orta bilimnen keiingi bilim berý, mamandandyrylǵan, arnaýly bilim berý uiymdarynda, jetim balalar men ata-ana qamqorlyǵynsyz qalǵan balalarǵa arnalǵan qosymsha bilim berý uiymdarynyń pedagog qyzmetkerleriniń jumysyna qoldanylady.
Zań jobasynda pedagogtyń kásibi qyzmetin júzege asyrýǵa arnalǵan sharttardy eńbek zańnamasyna sáikes jumys berýshi qamtamasyz etetini týraly ereje bekitiledi.
Bul rette elimizdiń zańdarynda kózdelgen jaǵdailardy qospaǵanda, ony kásiptik mindetterge bailanysty emes jumys túrlerine tartýǵa; odan bilim berý salasyndaǵy zańnamada kózdelmegen esep-qisapty ne aqparatty talap etýge; elimizdiń zańdarynda kózdelmegen tekserýlerdi júrgizýge; oǵan taýarlar men kórsetiletin qyzmetterdi satyp alý jónindegi mindet júkteýge tyiym salý arqyly pedagog júktemesin qysqartý; memlekettik orta bilim berý uiymdarynyń pedagogtaryn olardyń kásibi qyzmetin júzege asyrý kezinde memlekettik emes uiymdardyń sharalaryn ótkizýge tartý jónindegi erejeler naqty belgilengen.
Pedagogterdiń quqyqtaryn keńeitý maqsatynda olardyń quqyqtary úsh baǵyt boiynsha: kásibi qyzmetti júzege asyrý kezindegi pedagogtyń quqyqtary; pedagogtyń materialdyq qamtamasyz etý quqyǵy; pedagogtyń kótermeleý quqyǵy jazylǵan jáne jeke baptarda kórsetilgen.
Zań jobasynyń erejelerinde pedagogtarǵa áleýmettik kepildikter, onyń ishinde: uzaqtyǵy 56 kúntizbelik kún tólenetin jyl saiynǵy eńbek demalysy; turǵylyqty jeri boiynsha mektepke deiingi uiymdarda pedagogtardyń balalaryna jergilikti atqarýshy organdardyń birinshi kezekte oryn berýi belgilengen.
Senatorlar sondai-aq «Qazaqstan Respýblikasynyń keibir zańnamalyq aktilerine pedagog mártebesi, oqýshy men muǵalimge júktemeni tómendetý máseleleri boiynsha ózgerister men tolyqtyrýlar engizý týraly» zań jobasyn qarady.
Zań jobasymen birqatar zańnamalyq aktilerge ózgerister men tolyqtyrýlar engiziledi. Negizgi túzetýler elimizdiń «Bilim týraly» zańyna engizildi.
Bilim berý salasyndaǵy ýákiletti organnyń quzyreti - orta, tehnikalyq jáne kásiptik, orta bilimnen keiingi bilim berý uiymdary pedagogtar júrgizetin mindetti qujattardyń tizbesin jáne olardyń nysandaryn ázirleý jáne bekitý jónindegi jańa ókilettiktermen tolyqtyrylady.
Zań jobasymen joǵary jáne (nemese) joǵary oqý ornynan keiingi bilim berýdiń jekelegen memlekettik uiymdarynyń birinshi basshylaryn qyzmetke taǵaiyndaý jáne qyzmetten bosatý tártibine, attestattaýdan ótý tártibine qatysty ózgerister engiziledi.
Joǵary jáne (nemese) joǵary oqý ornynan keiingi bilim berý uiymdarynda kásiptik qyzmetti júzege asyratyn, kásiptik qyzmetti júzege asyrý úshin jaǵdailardy, onyń ishinde quqyqtardy, mindetterdi jáne áleýmettik kepildikterdi qamtamasyz etetin pedagog mártebesi týraly erejeler saqtalady.
Senatorlar pedagogikalyq kadrlardy daiarlaý, saýyqtyrý maqsattaryna tólemderdi arttyrý, aýyldyq jáne qala muǵalimderi úshin áleýmettik jeńildikterdi teńestirý jáne taǵy basqa máselelerdi kóterdi.
Zań jobalary Palatanyń qaraýyna berildi.
QR Parlamenti Senatynyń Baspasóz qyzmeti
