Elimizdiń mektepterinde 2025-2026 oqý jyly aiaqtalýǵa jaqyn. Biyl oqý jylyn 3,9 millionnan asa oqýshy aiaqtaidy. Onyń ishinde eki júz on bes myńnan astamy - 11-synyp túlekteri, dep habarlaidy dalanews.kz.
Oqý jylynyń qorytyndysy boiynsha 9-synypty úzdik aiaqtaýǵa úmitkerler sany 31 myńnan asady. Al 11-synypty úzdik aiaqtaýǵa 18 myń oqýshy - úmitker. Búginde elimizdiń bilim berý uiymdarynda 420 myńnan asa pedagog eńbek etedi.
Ministrlik málimetinshe, "Keleshek mektepteri" ulttyq jobasy aiasynda 217 zamanaýi mektep paidalanýǵa berilgen. Onyń 84-i aýyldyq eldi mekenderde ornalasqan. Qazir bul mektepterde 220 myńnan asa oqýshy bilim alyp, 16 myńǵa jýyq pedagog jumys istep jatyr.
Oqý jyly aiaqtalýyna orai 25 mamyrda elimizdiń mektepterinde "Bilimim – Otanyma!" taqyrybynda biryńǵai synyp saǵaty ótkiziledi. Synyp saǵattarynda oqý jyly qorytyndylanyp, oqýshylardyń jetistikteri men jarqyn sátteri eske alynady.
Oqý-aǵartý ministrligi jáne jergilikti atqarýshy organdardyń birlesken buiryǵy men qaýlysyna sáikes mektepke deiingi, orta, tehnikalyq jáne kásiptik, orta bilimnen keiingi bilim berý uiymdarynda saltanatty is-sharalardy meiramhanalarda, kafelerde, banket zaldarynda, demalys bazalarynda jáne tabiǵat aiasynda ótkizýge tyiym salynady.
"Ata-analardan, zańdy ókilderden jáne bilim alýshylardan saltanatty is-sharalarǵa bailanysty aqsha jinaýǵa, syilyqtar men ózge de materialdyq qundylyqtar talap etýge jol berilmeidi. Al attestat pen diplomdy saltanatty tabystaý rásimderi tek bilim berý uiymdarynyń qabyrǵasynda uiymdastyrylady", - dep jazylǵan habarlamada.
