OQO-da «Ordabasy» qoi tuqymynyń sany 125 myńǵa jetkizilmek
Onda spiker Elbasy Joldaýynda aitylǵan agrarlyq sektor ekonomikanyń jańa draiverine ainalýy kerek degen tapsyrmasyna orai, aldaǵy 4 jylda iaǵni, 2021 jylǵa qarai «Ordabasy» qoi tuqymynyń sanyn 125 myńǵa jetkizý josparlanyp otyrǵanyn atap ótti. Ol úshin arnaiy baǵdarlamada jasalyp jatyr.
Búginde básekege qabiletti Ordabasy qoi tuqymy aýylsharýashylyq óndirisine keńinen endirilgen, onyń jalpy sany 75 myń bastan assa, al taza tuqymdylarynyń sany 36 myńnan astam basty qurap otyr.
Qazaqstanda etti-maily qoi sharýashylyǵyn turaqty damytýdyń basty baǵyttary boiynsha aldyńǵy qatarly tájiribemen bólisken Nuradin Álibaev qazaqtyń qylshyq júndi quiryqty qoiy men edilbai tuqymy jáne sheteldik - gissar tuqymy tektik qory negizinde ordabasy qoi tuqymy jasalynǵanyn jetkizdi.
«Tehnologiia keshendi kelesi ǵylymi-zertteý jumystarynan turady: zertteý baǵytyn tańdaý; bastapqy tuqymdardyń joǵary tirilei salmaq, tezjetilgishtik jáne beiimdelýshilik qasietterin utymdy ushtastyrǵan baǵaly genotipterdi alýdyń ádistemelerin teoriialyq negizdeý; genetikalyq áleýeti joǵary jańa genotipterdi kóbeitýdiń ádistemesin jasaý jáne olardyń qasietterin kelesi izbasylyq urpaqtarda bekitý»,-dedi ǵylymi-zertteý institýtynyń orynbasary.
Baspasóz-konferentsiiasyna qatysqan «Seraly» ShQ tóraǵasy S.Ábjalov pen otyrarlyq «Bek» JShS tóraǵasy B.Zulpyharovtar jańa qoi tuqymynyń ereksheligine toqtaldy.
Olardyń aitýynsha, bul qoidyń kádýilgi qoidan ereksheliginiń biri tiridei salmaǵynyń joǵarlyǵynda eken. Máselen, analyqtar 72-85 kg bolsa, qoshqarlar 103,5-123 kelige deiin bolady. Sonymen qatar, jastólderdiń tez ósimdiligimen erekshelenedi. Iaǵni, 4 ailyq erkek qozylar etke ótkizýde 42-45 kg salmaq tartyp, soiys shyǵymdylyǵy 52% quraidy. Munymen qosa onyń ereksheligi etti jáne etti-maily baǵyttaǵy álemdik qoi tuqymdarymen básekelestiginde.
Aita keteiik, qoi jáne qozy etin óndirýdiń tiimdiligi orta eseppen 88,5%-dy quraidy. Osy maqsatta jańa tuqymnyń 12 385 asyl tuqymdy mal basy 125 qoi sharýashylyǵyn júrgizetin sýbektilerge satyldy jáne Qazaqstannyń ártúrli aimaqtarynda ósirilýde. Osy rette, «Seraly» sharýa qojalyǵy jyl saiyn Ordabasy qoi tuqymynyń 1000 basyn Qazaqstannyń ártúrli aimaqtaryna jiberip otyratytyn atap ótken jón.
OQO ákiminiń baspasóz qyzmeti
