Qazaqstan Respýblıkasynyń Premer-mınıstri Oljas Bektenov Qazaqstannyń tóraǵalyǵymen ótip jatqan Halyqaralyq Araldy qutqarý qory (HAQQ) basqarmasynyń ekinshi otyrysyna qatysýshy elder delegasıalarynyń basshylarymen kezdesý ótkizdi, dep habarlaıdy Dalanews.kz
Qazaqstan Halyqaralyq Araldy qutqarý qorynyń qyzmetine basa mán beredi jáne atalǵan uıymdy óńirdegi ekologıalyq sıpattaǵy máselelerdi sheshýdiń, transshekaralyq sý paıdalanýdyń utymdy ári ózara tıimdi quraldarynyń biri retinde qarastyrady.
Kezdesýde Aral teńizindegi sý deńgeıin arttyrý jónindegi birlesken sharalar, sonyń ishinde Qazaqstan Prezıdenti Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý» atty halyqqa Joldaýynda aıtqan bastamalary sheńberinde talqylandy.
Oljas Bektenov óz sózinde HAQQ-ǵa qatysýshy memleketterdiń basshylary energetıkalyq jáne azyq-túlik qaýipsizdigin qamtamasyz etýde strategıalyq mańyzy bar sý-energetıkalyq resýrstaryn paıdalanýdyń utymdy tásiline basymdyq beretinin atap ótti.
Osy jyldyń vegetasıalyq kezeńi óte qıyn ótti. Kúrdeli jaǵdaılarǵa qaramastan, úkimetterdiń syndarly ózara is-qımyly Aral teńizi baseıninde turaqty sý rejımin qamtamasyz etýge múmkindik berdi. Premer-mınıstr Qyrǵyzstan, Tájikstan jáne Ózbekstan Úkimetteriniń basshylaryna alǵysyn bildirip, úılestirilgen jedel is-qımyldar arqyly ǵana eleýli shyǵyndardyń aldyn alýǵa bolatynyn atap ótti.
«Ár eldiń óz ulttyq múddesi bar, biz ony qashan da qorǵaýǵa mindettimiz. Biraq bizdiń ortaq strategıalyq, uzaqmerzimdi basym maqsatymyz tatý kórshilik qarym-qatynas ekeni sózsiz. Kúndelikti, qysqamerzimdi mindetterdi sheshýde biz uzaqmerzimdi basymdyqtarǵa nuqsan keltirmeýimiz kerek. Máselelerdi árqashan ózara tıimdi ári qolaıly negizde sheshý úshin birlesken sharalar qabyldaıtynymyzǵa senimdimin»,— dep atap ótti Oljas Bektenov.
Qazaqstannyń tóraǵalyǵy aıasynda júrgiziletin jumystyń basym baǵyttarynyń biri – sıfrlyq transformasıa jáne sý salasynda jasandy ıntellektini qoldaný. JI engizý sýdy paıdalanýdyń ashyqtyǵyn qamtamasyz etedi jáne sý shyǵynyn azaıtýǵa múmkindik beredi. Aral teńizi baseıninde sý resýrstaryn esepke alýdyń, monıtorıń júrgizýdiń, basqarýdyń jáne bólýdiń biryńǵaı avtomattandyrylǵan júıesin engizý boıynsha birlesken jumystyń mańyzdylyǵy da atap ótildi.
Kezdesý barysynda, sondaı-aq Tájikstan Premer-mınıstriniń orynbasary Zıózoda Sýlaımon, Ózbekstan Prezıdentiniń keńesshisi Shýhrat Ganıev, Túrikmenstan aýyl sharýashylyǵy mınıstri Charyıar Chetıev sóz sóıledi.
Talqylaýdy qorytyndylaı kele, Premer-mınıstr Oljas Bektenov Qazaqstannyń ashyqtyq, yntymaqtastyq jáne syndarly dıalog qaǵıdattaryna beıil ekenin naqtylady.
