Ákejannyń atap ótkenindei eks-prezidenttiń Pýtinnen ózge janashyry joq. Máskeýge jii-jii barǵyshtap júrgen Nazarbaev óziniń jalǵyz qalǵanyn, jaǵdaidyń máz emesin jaqsy túsinedi.
"Álbette, ol Kremldiń shapqynshylyǵyn aqtamaidy. Qantógistiń ádiletsiz ekenin biledi. "Orys áleminiń" júrgen jerin oirandap, opat ákelerine kózi jetken. Soǵan qaramastan, Pýtinmen qarym-qatynasyn úzgisi joq. Sebebi, odan ózge arqasúieri joq. Kreml kósemi Nazarbaevtyń bostandyqta júrýine kepil bop otyr", – deidi Qajygeldin.
Qazaqtildi aýditoriia Qańtar tragediiasynyń basty sebepkeri retinde Nazarbaevtyń atyn ataidy. Otyz jylǵa sozylǵan ádiletsizdiktiń aqyr sońy qantógispen aiaqtalǵan edi.
Shetelge zańsyz shyǵarylǵan kapitaldyń izin kesken Qajygeldin urlanǵan aqsha sońǵy tiynyna deiin memleketke qaitarylýy tiis dep paiymdaidy. Bul máselede ózgelerge shúiligip, eks-prezidentti ainalyp ótýge áste bolmaidy.
"Bárin qaitarý qajet. Sonyń ishinde Nazarbaevtyń qaltasyn da qaǵyp-silký kerek. Otyz jyl boiy toqtaýsyz tonaldyq. Sonyń tóbe basynda turǵan tulǵa jaýaptan taiqyp ketse, el túsinbeidi. Halyq báribir de qaitarýǵa májbúrleidi.
Túptep kelgende osy kúnge deiingi árbir áreketi úshin jaýapkershilik arqalaidy, el eshteńeni umytpaidy.
Buǵan kommertsiialyq sebep te jetkilikti. Jańa Qazaqstannyń qazynasy bos. Bárin úptep ketken. Toqaevtyń tusyndaǵy Qazaqstan halyqtyń salyǵy esebinen ómir súrip jatyr. Jer qoinaýyndaǵy igilikten paida kórmei otyrmyz", – deidi ol.
Qajygeldin zańsyz kapitaldy elge qaitarýdyń sońy azamattyq soǵysqa ulasa ma dep qaýiptenedi.
Nazarbaev klany ońai berise qoimaidy, jyldar boiy shetke tasyǵanyn qyzǵyshtai qorǵap, Toqaevtyń ózine tap berýi múmkin.
"Eski júie Qańtarǵa deiin satylǵan munai-gazdyń aqshasyn talan-tarajǵa túsirip, teń bólip aldy. Munaidan túsetin paida bar bolǵany 30 paiyz. Sonyń ózine ashkózdikpen aýyz saldy", – deidi eks-premer.
Ákejan myrza Toqaevtyń sońǵy bir jyldyń kólemindegi tezisterin súzgiden ótkizip, prezidenttiń 3 maqsaty baryn bóle-jara kórsetipti.
"Ol memlekettiń menshigin túgendeýge múddeli. Onyń tusyndaǵy Qazaqstan saiasi-ekonomikalyq reformany júzege asyryp, álemdik naryqta oryn tabý úshin jańa taýarlar men qyzmetter usynýǵa tyrysady. Úshinshisi, eldiń egemendigi men aýmaqtyq tutastyǵyn qaýipsizdigin qamtamasyz etýge baryn salady", – deidi Qajygeldin.
