Qazaqstanda sportshylar arasynda ekstremızm men terorızmniń aldyn alý boıynsha jumystar júrgiziletin bolady. Bul týraly týrızm jáne sport vıse-mınıstri Serik Jarasbaev málimdedi, dep habarlaıdy Dalanews.kz.
"Akkredıttelgen sport federasıalaryna dinı ekstremızm men terorızmniń aldyn alý sharalaryn júzege asyrý mindetin engizý qajettilikke baılanysty qolǵa alynýda. Atap aıtqanda, bul bastama Ulttyq qaýipsizdik komıtetiniń (UQK) bir jumys otyrysynda usynyldy. Bizde Antıterror ortalyǵynyń (ATO) shtaby aıasynda birlesken jumystar júrgizilýde, osy baǵyttaǵy is-sharalardy júzege asyrý úshin arnaıy jol kartasy ázirlendi. 2027 jylǵa deıingi osy jol kartasy aıasynda biz bul normany Májiliste qaralyp jatqan zań jobasyna engizýge úlgerdik. Ol eki deńgeıde – respýblıkalyq akkredıttelgen federasıa deńgeıinde jáne jergilikti akkredıttelgen federasıa deńgeıinde júzege asyrylady. Búginde basty nazar radıkaldy ekstremızm men terorızmniń aldyn alýǵa baǵyttalyp otyr", – dedi Jarasbaev Senattyń kýlýarynda sóılegen sózinde.
Onyń aıtýynsha, qazirgi ýaqytta sport federasıalary bul máselemen júıeli túrde aınalysyp otyrǵan joq.
"Alaıda, biz federasıalar bul máselege nazar aýdarýy tıis kezeń kelgenine senimdimiz. Olar osyndaı qaýipti úrdisterdi erterek anyqtap, tıisti memlekettik organdarǵa jetkizýi qajet. Bul baǵyttaǵy jumystar bastalyp ketti. Osy aıdyń sońynda jáne sáýir aıy boıy biz shtab qyzmetimen birge aımaqtarǵa shyǵyp, túsindirý jumystaryn júrgizemiz. Al sáýirdiń sońyna qaraı nemese mamyr aıynyń basynda barlyq federasıalardy jınap, engizilgen normalar boıynsha keńeıtilgen túsindirý jumystaryn ótkizýdi josparlap otyrmyz. Bul sharalar ázirge tek aldyn alý sıpatynda júrgiziledi jáne olardyń basty maqsaty – osyndaı qaýip-qaterlerdiń aldyn alý. Sonymen qatar, bul jumysqa tıisti tájirıbesi bar teologtar da tartylatyn bolady", – dedi vıse-mınıstr.
