Qazaq aýditoriiasy Lafarierdi UQK-nyń eks-tóraǵasy Kárimov Másimovtiń sózin sóilegen depýtat retinde tanidy. Qańtar oqiǵasynan keiin kóp uzamai qamaýǵa alynǵan Másimov AQSh pen Batystaǵy lobbisterdiń kómegine júgingen. Sonyń ishinde frantsýz depýtaty airyqsha kózge túsken-tuǵyn.
Eýroparlament minberinde Másimovke arasha surap, dabyl qaqqan Lafarier "UQK-nyń eks-tóraǵasy eki ottyń ortasynda qaldy, ol repressiianyń qurbany boldy" dep málim etken.
"Parijdiń Kárim Qajymqanulyn abaqtydan bosatyp alýǵa pármeni jetedi. Qańtardan keiin qýdalaý kórgen saiasi tutqyndardyń ishinde Másimov isi erekshe kóńil bólýdi qajet etedi. Frantsýz biligi Kárimniń soty ádil ótýin qamtamasyz etýi tiis", - degen edi depýtat.
Buǵan sol tustaǵy Syrtqy ister ministri Muhtar Tileýberdi jedel jaýap qatyp, Batys jurtshylyǵy Qańtar tragediiasynyń mán-jaiyn bile bermeitinin aitqan.
Al Amnesty International Másimovtiń bertinge deiin bylyqtaryn jipke tizip, ony jazyqsyz japa shekkenderdiń sanatyna qosqan depýtat Lafarierdiń ýájin joqqa shyǵarǵan.
"Onyń tusynda Qazaqstannyń Qaýipsizdik komiteti eldegi erkin oily azamattarǵa kún kórsetpedi. Túrli shpiondyq baǵdarlamalardy paidalanyp Nazarbaevtyń opponentterin ańdýmen ainalysty", - dedi uiym ókilderi.
Kúni keshe Másimovtyń soiylyn soqqan Lafarierdiń ústinen iz qozǵalǵany belgili boldy.
Frantsiianyń Qarjy prokýratýrasy habarlaǵandai Lafarier depýtattyq mandatyn asyra paidalanyp, Másimov sekildi saiasi repýtatsiiasy kúmándi tulǵalarǵa ara túskeni úshin qomaqty syiaqy alǵan. Depýtattyń áreketin Ekologiia partiiasyndaǵy áriptesteri de aiyptaǵan.
"Másimov máselesi" Lafarierdiń ústinen is qozǵaýǵa túrtki bolǵan jalǵyz daý emes. Sonyń aiasynda depýtattyń ózge de korrýpiialyq áreketteri anyqtalýda. Lafarierdiń Parijdegi keńsesi men páterine tintý júrgizgen Qarjy prokýratýrasy ony jaýapqa tartýǵa negiz bolatyn qaǵaz-qujatty tárkilegen.
Aita ketelik, buǵan deiin DALA INSIDE telegram arnasynda "UQK-nyń eks-tóraǵasy amerikalyq lobbist Devid Merkeldiń kómegine júgindi" degen maqala jaryq kórgen.
"Aqordada onyń Qańtarǵa qatysy baryn rastaityn aiǵaq joq. Másimov Qaýipsizdik keńesiniń otyrysy aiaqtala sala qamaýǵa alyndy. Ash-jalańash kúiinde, resmi aiyp taǵylǵansha Aqordanyń jertólesinde túnedi. As-sýdan aiyrdy, tabanynan syz ótti, tiisti em-dom kórsetilmedi...", - dep dabyl qaqqan Merkel.
Maqalanyń tolyq nusqasy osy tusta: https://t.me/dalainside/1155
https://dalanews.kz/del-qazir/93856-songgy-ush-zhylda-qazaqmystagy-zhalaqy-823-p
