Mars ǵalamsharynyń alǵashqy turǵyny metanogendi mıkrobtar bolýy múmkin. Atalǵan mıkrob túrine zertteý júrgizgen AQSH-tyń Arkanzas ýnıversıtetiniń ǵalymdary osyndaı baılam jasaýda.

Qyzyl ǵalamsharda temperatýra men qysymnyń óte tómen ekeni ǵalymdarǵa belgili. Mundaı ortada adamnyń ómir súrýi múmkin emes. Tek mıkrobtar ǵana tirshilik ete alady. Osy rette amerıkandyq ǵalymdar Marstaǵydaı jasandy orta daıyndap, oǵan metanogendi mıkrobtardy jibergen. Nátıjesinde kózge kórinbeıtin mıkrobtar tómengi temperatýra men qysymda ómir súrýin jalǵastyryp, boıynan metan gazyn bólip shyǵarǵan. Ǵalymdar ǵylymı-zertteý jumystary jer sharynan jyraqta jatqan Mars ǵalamsharyn ıgerý jolyndaǵy mańyzdy qadam bolyp sanalatynyn málimdedi. Bolashaqta metanogendi mıkrobtardy Qyzyl ǵalamsharǵa jetkizip, jer sharyndaǵydaı qorshaǵan orta túzýge bolady.