Sultan Sársemálievke qatysty sotta marqumdardyń týystary joǵalǵan adamdarmen emes, olardyń atynan basqa bireýmen hat jazysyp otyrǵandaryn qalai birtindep túsingenin aityp berdi, dep dalanews.kz tilshisi "Aq Jaiyq" basylymyna silteme jasap habarlaidy.
Búgin Atyraý oblysynyń qylmystyq ister jónindegi mamandandyrylǵan aýdanaralyq sotynda Jangeldin aýylyndaǵy otbasynyń ólimine qatysty is boiynsha kýágerlerden jaýap alý jalǵasty.
Marqum Maqsot Qarabalinniń nemere qaryndasy Parizat Kenjeǵalieva ótken jyldyń 12 qarashasynda aǵasynyń maly men múlki satylyp jatqanyn estip, onyń úiine barǵanyn aitty. Sol jerde ol maldy tiep jatqan adamdardy kórip, satylymdy toqtatýǵa tyrysqan.
Onyń sózinshe, bul jaǵdai týraly ol Naýryz Muqanǵalievtiń WhatsApp nómiri arqyly bilgen. Ol kezde áiel habarlamalardy basqa bireý jazýy múmkin dep kúdiktenbegen.
Kýáger úi ieleri joq kezde múliktiń satylýyna úzildi-kesildi qarsy bolǵanyn aitty. Osydan keiin ol Naýryzǵa birneshe ret videoqońyraý shalýǵa tyrysqan, alaida eshkim jaýap bermegen.
Jaýap alý kezinde Kenjeǵalieva aiyptalýshynyń áreketine emotsiiasyn jasyra almady.
"Ol ólgen adamdy tiriltkendei áreket jasaǵan", – dedi ol.
Keiin ol Sultan Sársemálievke qarata sóz aitty.
"Olardyń kinási ne edi? Basyńdy kóter!" – dedi kýáger.
Sýdia eskertý jasaǵannan keiin kýáger jaýabyn jalǵastyrdy. Onyń aitýynsha, marqumdardyń otbasynda qaryz bolmaǵan, olar óz eńbegimen kún kórgen. Osy sózderdi aitqan kezde áiel jylap jiberdi.
Odan keiin marqum Maqsot Qarabalinniń nemere inisi Shalqar Muqanǵalievten jaýap alyndy.
Ol týystary joǵalǵannan keiin Naýryz Muqanǵalievpen birneshe ret bailanysýǵa tyrysqanyn aitty. Habarlamalardyń birine "qiyndyqtar bolyp jatyr, anam aýyryp qaldy" degen mazmunda jaýap kelgen.
Keiin Maqsot Qarabalin men onyń jubaiy Násip Óteshqalieva iz-túzsiz joǵalǵandar qatarynda bolǵan kezde, Shalqar WhatsApp arqyly Naýryzǵa taǵy da hat jazyp, ne bolǵanyn túsingisi kelgen.
Alaida bul joly jaýap bolmaǵan.
Kýágerdiń aitýynsha, ýaqyt óte kele habarlamalardyń ózi kúdik týdyra bastaǵan.
"Naýryz ádette qate jazatyn. Al munda hat jazý máneri múlde basqa boldy", – dep túsindirdi ol sotta.
Muqanǵaliev sotta aiyptalýshyǵa da ún qatty.
"Alla keshirimdi. Eger adam shyn júrekten ókinse, Alla keshiredi. Biraq sen ata-anańa, bes balańa, Aqbaiannyń týystaryna jáne bizge úlken qaiǵy qaldyrdyń", – dedi ol.
Kýáger Naýryzben birge óskenin jáne ony jaqsy tanyǵanyn aitty. Onyń sózinshe, Naýryz eshqashan janjalqoi adam bolmaǵan jáne Sársemálievpen arasynda qandai da bir aýyr kikiljiń bolǵanyn aitpaǵan.
Sondai-aq ol Aqbaiannyń týystary aiyptalýshyǵa qysym kórsetti degen nusqaǵa senbeitinin aityp, marqum adamdardy kinálamaýdy surady.
Muqanǵalievtiń sózinshe, Násip Óteshqalieva kerisinshe nemerelerine kómektesýge tyrysqan.
Sóz sońynda ol Sársemálievtiń Naýryz Muqanǵalievtiń ólimine qatysty aitqan ózin-ózi qorǵaý nusqasyna kúmán keltirdi.
"Adam bir ret pyshaq salǵannan keiin ádette qannan shoshidy. Al munda júregi tas bolyp ketkendei", – dedi kýáger.
