Májilis pen máslihat depýtattarynyń kezekten tys sailaýyn taǵaiyndaý týraly málimdeme jasaǵan Toqaev:
"Kúzdegi Joldaýymda Májilis pen máslihattar sailaýy osy jyldyń alǵashqy jartysynda bolatynyn jariialadym. Iaǵni, bul bastama aitylǵan sátten sailaýǵa deiin 6 aidan astam ýaqyt ótedi.
Osy kúnge deiin sailaýǵa daiyndalý úshin kandidattar men saiasi partiialarǵa osynshama kóp ýaqyt berilgen emes.
Májilistiń jáne máslihattardyń kezekten tys sailaýy –konstitýtsiialyq reformanyń jalǵasy. Halqymyz bul reformaǵa qoldaý bildirdi. Sonyń nátijesinde elimiz bilikti jańa, ádil ári ashyq básekege jol ashatyn qaǵida boiynsha jasaqtaýǵa kóshti", – dedi.
Onyń atap ótkenindei endigide Májilis depýtattarynyń 70 paiyzy partiialyq tizim arqyly, al qalǵan 30 paiyzy bir mandatty okrýgterden sailanady. Oblystar men respýblikalyq mańyzy bar qalalardaǵy máslihat depýtattary da aralas júie boiynsha sailanady.
Depýtattardyń 50 paiyzy bir mandattyq júie arqyly, 50 paiyzy partiialyq tizim boiynsha ótedi. Al aýdan jáne oblystyq mańyzy bar qalalardaǵy máslihat sailaýynda azamattar bir mandatty okrýgterden shyqqan kandidattarǵa daýys beredi.
"Májilis pen máslihattar jańa úlgi boiynsha jasaqtalady. Sonda sailaýshylardyń múddesi jalpyulttyq jáne aimaqtyq deńgeide tolyq qorǵalady. Bilikke túrli kózqarastaǵy azamattardyń kelýine múmkindik týady.
Konstitýtsiialyq reforma aiasynda saiasi partiialardy tirkeý rásimi jeńildedi. Partiia músheleriniń sanyna qatysty talap ózgerdi. Onyń tómengi shegi tórt ese tómendep, 20 myńnan 5 myńǵa deiin azaidy. Partiialardyń ár aimaqtaǵy ókilderiniń sany keminde 600 adam bolýǵa tiis edi, al qazir 200 adamǵa deiin tómendedi.
Osynyń nátijesinde elimizde kóp ýaqyttan beri alǵash ret birneshe jańa saiasi partiia tirkeldi. Sonymen birge sailaý biýlletenine «bárine qarsymyn» degen baǵannyń engizilýi óte mańyzdy sheshim boldy", – dedi Memleket basshysy.
Aita ketelik, sońǵy ózgeristerge sai partiialardyń Májiliske ótýine qajetti daýystyń tómengi shegi 7-den 5 paiyzǵa deiin azaiǵan.
Toqaevtyń aitýynsha bul– elimizdi demokratiialandyrý jolyndaǵy airyqsha máni bar qadam. Sailaý úderisine qoǵamnyń túrli ókilderin barynsha tartý úshin zańnamaǵa basqa da ózgerister engizilgen.
Atap aitqanda, depýtattyq mandattyń 30 paiyzyn áielderge, jastarǵa jáne erekshe qajettiligi bar azamattarǵa bólý zań júzinde bekitildi.
Osy jaittardy tilge tiek etken Toqaev munyń bári saiasi básekeni kúsheitetinin, saiasi júieniń ashyqtyǵyn qamtamasyz etetinin aitty.
Sondai-aq saiasattaǵy jańa býynynyń qalyptasýyna jol asharyna senim bildirdi.
"Aldaǵy sailaýdyń zańǵa sáikes ótýine, ádil ári ashyq bolýyna qatań baqylaý jasalady. Buǵan Ortalyq sailaý komissiiasy jáne Bas prokýratýra jaýapty.
Sailaý naýqanyn otandyq jáne halyqaralyq baiqaýshylar jiti qadaǵalaidy. Osy tusta azamattarymyzdyń baiqaýshy retinde belsendilik tanytýy mańyzdy. Zańǵa sai barlyq kandidat pen partiianyń buqaralyq aqparat quraldaryna shyǵýyna birdei múmkindik beriledi.
Osy sailaý naýqany elimizdegi saiasi mádeniettiń joǵary ekenin aiqyn kórsetedi dep senemin. Bul sailaý qoǵamdaǵy ózgeristerdiń kórinisi retinde saiasi júiemizdiń odan ári jańǵyrýyna yqpalyn tigizedi.
Májilis pen máslihat sailaýy bilik institýttaryn jańǵyrtý jumystarynyń qorytyndy kezeńi bolmaq. Osylaisha, "Kúshti Prezident – yqpaldy Parlament – esep beretin Úkimet" qaǵidaty tolyq iske asady.
Biz Ádiletti Qazaqstandy quryp jatyrmyz.
Barshańyzdy azamattyq jaýapkershilik tanytyp, Májilis pen máslihat sailaýyna belsene qatysýǵa shaqyramyn", – degen pikir bildirdi.
Osy tusta "Halyq banki" Timýr men Dinara Qulybaevaǵa qomaqty divident tóledi. Muny myna aradan bile alasyz: t.me/dalainside
