Astanadaǵy jeńil relsti kólik (LRT) qurylysyn qarjylandyrý úshin memleket menshigine qaitarylǵan aktivter paidalanylýy múmkin be? Bul saýalǵa vitse-premer – Ulttyq ekonomika ministri Serik Jumanǵarin májilistegi brifing barysynda jaýap berdi, dep habarlaidy Dalanews.kz.
Ministrdiń aitýynsha, qazirgi tańda mundai tásil qarastyrylyp jatqan joq.
"LRT-ny biz qazir respýblikalyq biýdjet esebinen qarjylandyryp jatyrmyz. Biyl jobanyń birinshi kezegin aiaqtaýdy josparlap otyrmyz. Ashyq aitqanda, aktivterdi osy maqsatta paidalaný týraly áńgime estigen emespin. Qazirgi biýdjette LRT qurylysyna naqty qarajat kózdelgen", – dedi Jumanǵarin.
2024 jyldyń mamyr aiynda jeńil relsti kóliktiń qos jolaqty 22,4 shaqyrymdyq jelisiniń 5,6 shaqyrymy tóselgeni belgili boldy. Biylǵy jyly №116 jáne №117 stantsiialar arasyndaǵy estakadada alǵashqy 500 metr jol salyndy. Bul synaq kezeńi aýa raiynyń joldyń sapasyna áserin zertteýge múmkindik berdi.
Qańtar aiynda Astana ákimi Jeńis Qasymbek LRT qurylysy 2025 jyldyń jazynda tolyq aiaqtalatynyn málimdegen edi. Qyrkúiek aiynda alǵashqy poiyzdar jetkizilip, synaq rejimindegi júrister bastalmaq. "City Transportation Systems" kompaniiasy qazirdiń ózinde jeńil relsti kólik júiesine dispetcherlerdi oqytý úshin aldyn ala irikteý júrgizip jatyr.
Jeńis Qasymbek sonymen qatar jolaýshylar úshin jolaqy shamamen 100-200 teńge aralyǵynda bolady dep habarlady.
