Astanada V Dúniejúzilik kóshpendiler oiyndary aiaqtaldy. Dúbirli synda Qazaqstan ulttyq quramasy aiqyn basymdyqpen kósh bastady. Ortaq jeńiske Túrkistan oblysynyń órenderi airyqsha úles qosyp, 30-ǵa jýyq medal enshiledi. Naqtyraq aitqanda, 16 altyn, 8 kúmis jáne 5 qola medal oljalady, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Túrkistan oblysynyń osy jetistigin tarqatyp aitsaq, 16 altynnyń 10-yn Tólebi aýdanynyń saiypqyrandary ielenip, ulttyq sportta kósh basynda ekenin kórsetti.
Qazaq kúresinen áielder arasynda barlyq qarsylasynyń jaýyrynyn jerge tigizip, boz kilemde atoi salǵan túrkistandyq arý Aijan Jylqybaeva, alyptar saiysynda Arys qalasynyń betke ustary Azamat Maqulbekov álemniń 16 elinen kelgen apaitós alyptardy qapy qaldyryp, jeńimpaz boldy.
Jamby atýdan úsh birdei sportshy mergendigimen kózge túsip, jeńis tuǵyrynan kórindi. Jamby atýdyń Aziia stilinen Batyr Beksaýyt top jarsa, Túrki stilinen Eralhan Aikóz chempion boldy.
Al tórt túrkistandyq kókparshy ulttyq quramada óner kórsetip, altynnan alqa taqty. Qosa keteiik, teńge ilýden Rahat Qambarov barlyq teńgeni ilip, jeńistiń shyńyn baǵyndyrsa, shapshańdyq pen oilaý qabiletin talap etetin ziiatkerlik oiyn túri ovariden Ásel Dalieva barlyq qarsylasynan ailasyn asyryp ketti.
Jeńisti joldy asyq atýdan Aitqulov Amandos jalǵap, altynnan alqa taǵyp, el mereiin asqaqtatty.
