Qazaqstannyń Konstitýtsiialyq soty ajyrasqan ata-analardyń balamen kezdesý quqyǵyna qatysty mańyzdy sheshim qabyldady, dep habarlaidy dalanews.kz.
Konstitýtsiialyq sottyń túsindirýinshe, másele sot ajyrasqan ata-ananyń balamen kezdesetin kúnderi men ýaqytyn belgilegenimen, keibir jaǵdaida ekinshi ata-ananyń bul sheshimdi oryndamai, kezdesýge kedergi keltirýinen týyndaidy. Sonyń saldarynan óz quqyǵyn júzege asyrý úshin ata-ana jeke sot oryndaýshysyna júginýge májbúr bolady.
Konstitýtsiialyq sot osy ýaqytqa deiin qoldanystaǵy tártip boiynsha jeke sot oryndaýshysynyń qyzmetine aqy tóleý mindeti tek sot sheshimin oryndamaǵan tarapqa ǵana emes, balasymen kezdesý quqyǵyn sot arqyly qorǵap shyqqan ata-anaǵa da júktelgenin atap ótti. Saldarynan ata-ana aldymen óz quqyǵyn sotta dáleldep, keiin sol sheshimniń oryndalýyn qamtamasyz etý úshin qosymsha shyǵyn shyǵarýǵa májbúr bolǵan.
Aitýlarynsha, mundai normanyń Konstitýtsiia talaptaryna sáikes kelmeitinin málimdedi.
“Árbir ata-ana balasynyń tárbiesi men damýyna tikelei qatysýǵa mindetti. Sot sheshimderin májbúrlep oryndatý tetigi balanyń eki ata-anasymen de qarym-qatynasyn saqtaýǵa múmkindik berýi tiis jáne bul quqyq ata-ananyń qarjylyq jaǵdaiyna táýeldi bolmaýy kerek”, – dep atap ótti Konstitýtsiialyq sot.
Osy sheshimge sáikes, Úkimet alty ai ishinde jeke sot oryndaýshylarynyń qyzmetine aqy tóleý tártibin qaita qarap, zańnamaǵa tiisti ózgerister engizýi tiis.
Bul ózgerister sot balamen kezdesý quqyǵyn tanyǵan ata-analardyń óz quqyqtaryn qosymsha qarjylyq shyǵynsyz júzege asyrýyna múmkindik beredi.
