Astana men Almaty turǵyndary kommýnaldyq qyzmetterge tólemaqynyń óskenin aityp jatyr. Áleýmettik jelilerde qala turǵyndary túbirtekterin jariialap, tarifterdi talqylaýda. Bul jaǵdaiǵa Tabiǵi monopoliialardy retteý komiteti túsinikteme berdi, dep habarlaidy Dalanews.kz Tengrinews.kz saityna silteme jasap.
Máselen, Astana turǵyndary biylǵy alǵashqy Birińǵai esep aiyrysý ortalyǵynyń túbirtekterin alǵannan keiin kommýnaldyq tólemderdiń kúrt artqanyn aitady. Olardyń sózinshe, jylý úshin tólem ótken ailarmen salystyrǵanda 1,5–2 ese ósken.
Komitettiń málimetinshe, qazir retteletin kommýnaldyq qyzmetter tarifterin kóterýge moratorii qoldanysta. Oǵan elektr energiiasy, jylý, sý jáne sý burý qyzmetteri jatady. Osy kezeńde Komitet pen onyń aýmaqtyq departamentteri tarifterdi qaita qaraý nemese kóterý jumystaryn júrgizbegen.
Vedomstvonyń habarlaýynsha, 2025 jylǵy jeltoqsan jáne 2026 jylǵy qańtar ailary úshin jylý tólemderi jalpyúilik eseptegishterdiń naqty kórsetkishteri negizinde eseptelip, zańnamaǵa sáikes páter aýmaǵyna proportsionaldy túrde turǵyndarǵa bólingen.
Tekserý nátijesinde qańtar aiyndaǵy túbirtekterdegi somanyń ósýi jylytý maýsymynda jylý energiiasyn naqty tutynýdyń artýymen bailanysty ekeni anyqtalǵan.
Komitet ókilderi tutyný kólemi aýa temperatýrasyna jáne jylýmen qamtý rejimine táýeldi ekenin naqtylady.
Mysaly, 2025 jylǵy jeltoqsanda Astanada ortasha ailyq temperatýra –8 gradýs bolsa, 2026 jylǵy qańtarda –14,3 gradýsqa deiin tómendegen. Osyǵan bailanysty jylý energiiasyn tutyný artqan, bul tólem qujattarynda kórinis tapqan.
Komitettiń málimetinshe, elektr energiiasy, sý jáne sý burý qyzmetteri úshin tólemder esepteý quraldarynyń naqty kórsetkishteri negizinde júrgiziledi. Eger kórsetkishter ýaqtyly tapsyrylsa, tólem naqty tutynylǵan kólem boiynsha esepteledi.
Sondai-aq vedomstvo retteletin kommýnaldyq qyzmet tarifteri qosylǵan qun salyǵyn (QQS) esepke almai bekitiletinin atap ótti. Al qyzmet naqty kórsetilgen kezde QQS salyq zańnamasyna sáikes túbirtekke qosylady, bul sońǵy tólem somasyna áser etedi.
Komitettiń aitýynsha, túbirtekterdegi ortasha ósim 3–4 paiyz shamasynda, bul tarifterdiń qymbattaýy bolyp sanalmaidy.
Mysal retinde: eger qyzmet úshin eseptelgen soma 500 teńge bolsa, QQS mólsherlemesi 12 paiyz kezinde salyq 60 teńge bolady da, jalpy tólem 560 teńgeni quraidy. Al QQS 16 paiyz bolǵan jaǵdaida salyq 80 teńge, al túpkilikti soma 580 teńge bolady.
Iaǵni naqty ósim 20 teńge nemese burynǵy tólemniń shamamen 3,6 paiyzy.
