2026 jyldyń basynan beri Túrkistan oblysynda Qyrym-Kongo gemorragiialyq qyzbasy diagnozymen 8 adam aýrýhanaǵa jatqyzyldy. Olardyń arasynda Ózbekstan azamattary da bar, dep habarlaidy dalanews.kz.
Túrkistan oblysynyń sanitariialyq-epidemiologiialyq baqylaý departamentiniń basshysy Nurbek Nyshanov Óńirlik kommýnikatsiialar qyzmetinde ótken brifingte óńirde jyl basynan beri osy infektsiianyń segiz jaǵdaiy tirkelgenin aitty.
Onyń sózinshe, juqtyrýdyń negizgi bóligi aýyl sharýashylyǵy janýarlarymen bailanys kezinde bolǵan. Segiz jaǵdaidyń altaýynda adamdar maldy kútý jáne janýarlarmen tikelei bailanysta bolǵan kezde infektsiia juqtyrǵan. Taǵy bir adamdy aýladaǵy shópti shaýyp júrgen kezde kene shaqqan.
Qyrym-Kongo gemorragiialyq qyzbasy kene shaǵýy arqyly beriletin jiti infektsiialyq aýrýlardyń qataryna jatady. Aýrý kezinde aǵzanyń ýyttanýy jáne teri men ishki aǵzalarda qan ketý belgileri baiqalýy múmkin.
Qazaqstanda infektsiianyń tabiǵi oshaqtary ońtústik óńirlerde, sonyń ishinde Túrkistan oblysynda kezdesedi. Diagnoz qoiylǵan naýqastar infektsiialyq statsionarlardyń arnaiy bólimderine oqshaýlanady.
Resmi málimet boiynsha, 2002 jyldan beri Túrkistan oblysynda Qyrym-Kongo gemorragiialyq qyzbasyn juqtyrýdyń 39 jaǵdaiy anyqtalǵan. 2022 jyly óńirde infektsiianyń 12 jaǵdaiy rastalyp, onyń bireýi ólimmen aiaqtalǵan. 2023 jyly taǵy alty jaǵdai tirkelgeni habarlanǵan.
Mamandar dalada júrgen kezde deneni tolyq jabatyn kiim kiiýdi usynady. Úige oralǵannan keiin deneni, kiim men zattardy keneniń bar-joǵyna muqiiat tekserý qajet.
Aýrý kene arqyly ǵana emes, juqtyrǵan janýardyń qany nemese tinderimen bailanys kezinde de berilýi múmkin. Sondyqtan mal kútimimen ainalysatyn adamdarǵa saqtyq sharalaryn saqtaý mańyzdy.
