Kórshiles eldiń aqparat keńistigin súzip shyqqan Dalanews.kz reseilik media keńistikte Astananyń úkimine narazylyq kóbeigenin ańdady.
Reseilik telegram arnalardyń kontentine qarap-aq, bul jait propaǵanda ókilderiniń shymbaiyna batqanyn baiqaýǵa bolady.
Kesheli beri atyshýly Marǵarita Simonianmen affirlengen arnalarda "Qandelaki málimdemesi biteý jaranyń aýzyn ashty" degen saryndaǵy kontent sany kúrt kóbeigen.
Reseilik propagandanyń paiymdaýynsha, Qandelakidi "shettetýdiń" artynda memkeńesshi Erlan Qarin bastaǵan saiasi arenadaǵy salmaqty figýralar tur.
"Orys tilin tunshyqtyrý saiasaty memlekettik deńgeide júrip jatyr. Qazaqstan osy áreketimen Máskeýge qyr kórsetýde. Toqaev Reseidiń soǵys saldarynan az-kem álsiregenin utymdy paidalanyp, AQSh pen Batystyń kóńilinen shyǵýǵa tyrysýda", - deidi Kremlge baǵynyshty media.
Qandelakidiń "qara tizimge" engenine qapalanyp jatqan reseilik BAQ bul máselege Syrtqy ister ministri Sergei Lavrovtyń aralasýyn surap, Tina hanymǵa arasha túsýin talap etýde.
Kremlden taraityn insaiderlik aqparatty ańdyp otyratyn "Preemnik" arnasyna belgili bolǵandai Qandelaki málimdemesi Máskeýdiń nusqaýymen jasalǵan.
Qaýipsizdik keńesiniń hatshysy Niqolai Pátrýshevpen affirlengen arna:
"Tinanyń Qazaqstanǵa qarai "abalaýy" tegin emes. Muny kezekti haip dep oilasańyz, qatelesesiz. Máskeý Tinany utymdy paidalana biledi jáne qajet kezinde iske qosty.
Osylaisha ishki-syrtqy saiasatta derbes sheshim qabyldap, Kremldiń ekonomikalyq múddesine kereǵar kelip jatqan Toqaevqa eskertý jasady. Resei Astanaǵa ekonomikalyq sheshim qabyldaýda teriskeige kóńil bólý qajettigin eske saldy. Álbette, til máselesi de aktýaldy. Alaida "til faktory" Pýtindi asa qatty tolǵandyryp otyrǵan joq.
Kreml ideologtary Tinany maqsatty túrde tańdap aldy. Qazaq ultshyldary Qandelakige "orys shovinisi" degen aidar taǵa qalmaidy. Tegi grýzin azamatyn shovinist dep aiyptaýy orynsyz bolar edi", — deidi.
Máskeý Astana sabasyna túsirý úshin propaǵandisterdi aidap salatyn ádisti talaidan beri qoldanyp keledi. DALA INSIDE telegram arnasyna málim bolǵandai Aqorda mundai arandatýǵa laiyqty jaýap beretin mehanizmder ázirleý ústinde.
https://dalanews.kz/sadak/98324-qazaqstandagy-iri-zhobanyng-artynda-pu
