Taldyqorǵan politsiiasynyń burynǵy basshysy Marat Kúshtibaevtyń artynan taǵy úsh adam temir torǵa toǵytylyp otyr, - dep habarlaidy Dalanews.kz "KTK" telearnasyna siltep.
Mán-jai
Olar - eks-politseiden «jábir kórdim» degen áiel men onyń tanysy jáne Taldyqorǵan sotynyń hatshysy. Tergeýde Kúshtibaevtyń zaiyby men aǵasyna hatshydan jazany jeńildetýge bolady degen usynys túsken kórinedi.
"Óitkeni jábirlenýshi sotta óz aiǵaqtaryn ózgertýi úshin hatshy qyz arqyly 50 mln teńge talap etipti. Sóitip qarjynyń qomaqty bóligi qyzǵa berilgenimen, aiǵaqtar ózgertilmegen. Marat Kúshtibaev 11 jylǵa sottalady. Áieli berilgen aqshany qaitarýdy surap, keiin alaiaqtyq faktisi boiynsha politsiiaǵa aryz jazǵan", - dep jazylǵan málimette.
Osylaisha Kóksý aýdandyq sýdiasy bylyqtyń betin ashyp, úsheýin de 6 jylǵa bas bostandyǵynan aiyrdy.
"Sot jeńildetetin jáne aýyrlatatyn mán-jaidy eskere otyryp, A., S. jáne K.-ni QR QK 190-baby, 4-bóligi, 2-tarmaǵy boiynsha kináli dep tanyp, árqaisyna 6 jyl bas bostandyǵynan aiyrý jazasyn taǵaiyndady. Sot úkimi zańdy kúshine engen joq", - dep jazylǵan Jetisý oblysy Kóksý aýdanynyń soty málimetinde.
Kúshtibaevqa qatysty is
2023 jylǵy qarashada Taldyqorǵan politsiiasynyń burynǵy bastyǵy Marat Kúshtibaev 27 jastaǵy áieldi zorlady degen kúdikpen ustaldy. Keiinirek jábirlenýshiniń advokaty oqiǵanyń egjei-tegjeiin aitty. Onyń sózinshe, 2023 jylǵy 12 qarashada ishki ister basqarmasyna qoǵamdyq tártipti buzdy degen aiyppen Taldyqorǵan turǵyny jetkizilip, keiin ol bastyqtyń qyzmettik kabinetinde zorlyq kórgen.
Keiin sot úkimi boiynsha Kúshtibaev kináli dep tanylyp, Qylmystyq kodekstiń 120-baby 2-bóliginiń 5-tarmaǵy boiynsha 11 jylǵa bas bostandyǵynan aiyryldy. Sondai-aq, ol marapattarynan jáne "politsiia polkovnigi" arnaiy ataǵynan aiyryldy.
