J.Túimebaev ushaq apatynan qaza bolǵan dáriger T.Patsaevtiń otbasyna kóńil aitty
Qaiǵyly jaǵdai barsha otandastarymyzdyń qabyrǵasyn qaiystyrǵanyn aitqan óńir basshysy, otbasylary úshin orny tolmas aýyr qaiǵy ekenin jetkizdi.
– Bul dárigerler qyzmettik mindetin oryndaý kezinde qaza boldy. Aq halatty azamattardyń adamdardyń ómirin saqtap qalý jolyndaǵy adal eńbekterin el esinde máńgi saqtaityn bolady. Áýe apatynan qaitys bolǵan dárigerdiń biri Talǵat Patsaev – bizdiń jerlesimiz edi. 20 jyldyq eńbek ótili bar akýsher-ginekolog, meditsina ǵylymdarynyń doktory Talǵan Anapiuly osy ýaqyt ishinde qanshama ananyń ómirin saqtap qaldy, – dedi ákim.
Sonymen qatar, ákim barsha ońtústikqazaqstandyqtardyń atynan qaza ekipaj músheleri – áýe kemesiniń komandiri Gennadii Tsoi, ekinshi ushqysh Evgenii Kýtafin, aviatehnik Beishibek Ahmatbaevtyń týǵan-týystary men jaqyndaryna kóńil aitty.
Talǵat Patsaev 2009 jyldan qazirgi tańǵa deiin QR Densaýlyq saqtaý ministrliginiń akýsherlik is, ginekologiia jáne perinatologiia Ǵylymi ortalyǵynyń operblok meńgerýshisi qyzmetin atqarǵan. Joǵarǵy sanattaǵy maman bolǵan. Jubaiy Nurjamal Jardemalievamen eki ul tárbielep, ósirgen.
Eske salaiyq, 3 qazanda keshki ýaqytta Almatydan Shymkentke dárigerler brigadasy aýyr jaǵdaida jatqan júkti áielge kómektesý úshin sanitarlyq aviareisimen jolǵa shyqqan bolatyn. «AN-28» ushaǵy saǵat 18:47-de Almatydan 28 shaqyrym qashyqtyqta radardan joǵalyp ketip, saǵat 19.15-te ushaq Almaty oblysy Ile aýdanynyń Mejdýrechinsk aýyly mańynda apatqa ushyrap, órtengeni habarlanǵan.
OQO ákiminiń baspasóz qyzmeti
