Jetisý ýniversitetinde XIII jazǵy Ýniversiada oiyndaryna qatysatyn stýdenttermen kezdesý ótti.
Kezdesýde Basqarma tóraǵasy – rektor Ermek Bóribaev jarysqa qatysýshy sportshylarǵa sáttilik tilep, komanda kapitany dene shynyqtyrý jáne óner fakýltetiniń 2 kýrs stýdenti Altai Qalqamanǵa ýniversitet bairaǵyn saltanatty túrde tabystady.
«Jetisý ýniversitetiniń stýdentteri sport jarystarynda úzdik kórsetkishterge qol jetkizip keledi. Byltyr stýdentterimiz Álem, Aziia, halyqaralyq jáne respýblikalyq chempionattarda 26 altyn, 20 kúmis, 10 qola medalǵa ie boldy. Bilim ordasynyń mereiin asyryp júrgen mundai sportshylarymyzdy biz árdaiym maqtan tutamyz. Búgin de aramyzda saidyń tasyndai iriktelgen úzdikter otyr. Biz sizderge senemiz!» – dedi rektor.
Is-shara barysynda Jetisý ýniversitetiniń qurmetti professory, ardager ustaz Bolat Moldabekov stýdentterge aq batasyn berse, QR eńbek sińirgen jattyqtyrýshysy Kanat Shonyrakov jarys jolynda sáttilik tiledi.
Sportshylar óz kezeginde túrki áleminiń rýhani astanasy – Túrkistanda ótetin jarystan júldemen oralýǵa ýáde berdi.
XIII jazǵy Ýniversiada oiyndarynda ýniversitetimizdiń sportshylary jeńil atletika, toǵyzqumalaq, basketbol, voleibol, dziýdo, taekvando, erkin kúres, grek-rim kúresi, boks, fýtzal sekildi sporttyń 11 túrinen baq synaidy. Túrkistan tórinde ótetin dúbirli dodada Jetisý ýniversitetiniń sportshylary biik belesterdi baǵyndyryp, oqý ornynyń mereiin ústem etedi dep senemiz.
