İ. Jansúgirov atyndaǵy Jetisý ýnıversıtetiniń ujymy birneshe jyldan beri Taldyqorǵan qalasyndaǵy «Aınalaıyn» balalardy qoldaý ortalyǵyna qamqorlyq kórsetip keledi.
Mereke kúnderi ýnıversıtet qyzmetkerleri men stýdentteri balalar úıine arnaıy baryp, syılyqtar berip, tanymdyq oıyndar uıymdastyryp, tárbıelenýshilerdiń kóńilin kóterip qaıtady. Balalarǵa únemi kómek kórsetý maqsatynda stýdentter eriktiler tobyn qurdy. «Raıs-ap» tobynyń músheleri aınalaıyndyqtarǵa aǵylshyn tilin tegin úıretip, úı tapsyrmalaryn oryndaýǵa kómektesedi.

Ýnıversıtettiń «Shyn júrekten» dep atalatyn qaıyrymdylyq sharasyna bıyl 10 jyl toldy. Osyǵan oraı, bilim ordasynda Gýmanıtarlyq fakúltetiniń uıymdastyrýymen dástúrli merekelik kesh ótti. Oǵan «Aınalaıyn» ortalyǵynyń tárbıelenýshileri men qyzmetkerleri qatysty.

Igi sharada Basqarma tóraǵasy-rektor Ermek Bóribaev sóz alyp, birqatar qyzmetkerlerge Alǵys hat tabystady. Rektor óz sózinde búldirshinderdiń júregine jol taýyp, ýaqytpen sanaspaı janynan tabylyp, olardy izgilik pen meıirimge tárbıelep júrgen tárbıeshilerdiń eńbegin joǵary baǵalady.

Sonymen qatar, dostyq qarym-qatynasty jandandyrý maqsatynda «Aınalaıyn» balalardy qoldaý ortalyǵymen Memorandýmǵa qol qoıyldy.

«Búgingi tańda «Aınalaıyn» ortalyǵynda 90-ǵa jýyq bala tárbıelenip jatyr. 10 jyl ishinde Jetisý ýnıversıtetiniń ujymy toǵyz myńnan astam balaǵa qamqorlyq jasap, qol ushyn sozdy. 30-ǵa jýyq «Aınalaıynnyń» túlegi Jetisý ýnıversıtetinde joǵary bilim alyp, aldy túrli salada eńbek etip júr. Bıylǵy túlekterdiń tórteýi Jetisý ýnıversıtetin tańdap otyr. Jyldar boıy kórsetken qamqorlyqtaryńyz úshin barlyq balalardyń jáne ujymnyń atynan sheksiz alǵys aıtamyn»,-dedi «Aınalaıyn» ortalyǵynyń dırektory Gúlmıra Ahmetova.

Shara barysynda Naýryz aıynda týǵan balalarǵa stýdentter tátti tort pen syılyq tabystady. Qýanysh pen shattyqqa toly merekede balalar úlkenderge alǵysyn án-bımen jetkizdi.