Jańa joba jastardyń belsendiligin arttyrady
Memleket basshysy Qasym-Jomart Toqaev elimizdiń basqarý tizginin qolǵa alǵaly beri memlekettik jastarǵa degen qamqorlyǵyn arttyra tústi desek bolady. Bul rette «Eriktiler jylyn» jariia etip, jastardy qoldaýǵa basa kóńil bólingeni aiqyn mysal bolady.
Aqparattyq tehnologiialar saǵat sanap damyp jatqan kezeńde jastardyń nazaryn ózine aýdaryp, oiyn basqaǵa buryp áketetin jaittar jetip artylady. Mundai jaǵdaida jastardyń belsendiligin arttyryp, qoǵam ómirine aralasýyn qamtamasyz etý mańyzdy bolmaq.
Desek te, qazirgi elimizdiń aýdandy aitpaǵan kúnniń ózinde, aýyldy jerlerdegi jastar resýrstyq ortalyqtary qurylyp, el jastarynyń paidaly ispen ainalysýyna barlyq jaǵdai jasalýda. Jastar resýrstyq ortalyqtary jastar men memlekettiń arasyndaǵy kommýnikatsiiany jandandyryp otyr dep nyq senimmen aitýǵa bolady. Ortalyqtar jastardyń qoǵam ómirine belsene aralasýyna, mansabyn ósirýge tamasha múmkindik syilap otyr.
Endigi kezekte Jastar jáne otbasy isteri komiteti qolǵa alǵan «Jańa jaǵdaidaǵy jastar: is-qimyl kezeńi» jobasyna oralsaq. Bizdińshe, bul joba pandemiia kezinde jastardyń azamattyq belsendiligin tómendetpeý úshin qolǵa alynǵan mańyzdy shara ekenin túsindik.
Jobanyń ashylýynda sóz sóilegen Jastar jáne otbasy isteri komitetiniń tóraǵasy Shahmardan Baimanov joba onlain formatta ótip, elimizdiń 17 óńirin tolyqtai qamtitynyn alǵa tartty. 9 qarashadan 8 jeltoqsanǵa deiingi aralyqty qamtityn jobaǵa elimizdegi myńdaǵan jas qatysyp, túrli baǵyttar boiynsha biliktiligin damytýǵa múmkindik alyp otyr eken. Osy rette joba jastardyń ziiatkerlik qabiletin, tulǵalyq bolmysyn damytý, kásipkerlik daǵdylaryn arttyrýdy jáne volonterlik qyryn damytýdy kózdeitinin aita ketýimiz kerek. Jastardyń jeke qasietterin damytý úshin elimizdegi tańdaýly 25 spiker tańdalynyp alynǵan. Olar ózderiniń jiǵan tájiribesimen bólisip, jastardyń qoiǵan suraqtaryna jaýap beretin bolady.
Al Online Dialog dep atalatyn baǵytta uiymdastyrýshylar jastar men bilik basyndaǵy tulǵalardyń basyn qosyp, jastar úshin ózekti taqyryptar boiynsha pikir almasý máselesi qarastyrylmaq. Jalpy, onlain pikir almasýda ortalyq bilikte jumys isteitin laýazymdy tulǵalar turǵyn úi, jastardy jumyspen qamtý, jastar kásipkerligin damytý máseleleri boiynsha oi bólisýdi kózdep otyr.
Osylaisha, «Jańa jaǵdaidaǵy jastar: is-qimyl kezeńi» jobasy elimizdegi jastardyń qoǵamdyq-saiasi belsendiligin kóterip, olardyń boiynda senim qalyptastyrýdy kózdep otyr.
Ainur JUMAHAN
